Беларускі народ заплаціў за перамогу ў Вялікай
Айчыннай вайне непамернай цаной, па яе зямлі раскіданы не адна сотня магіл, дзе
пахаваны абаронцы радзімы. Сярод іх — шмат невядомых. Многія імёны на працягу
гэтых пасляваенных гадоў аднавіліся ў людской памяці, але работа па іх
устанаўленню працягваецца.

Напярэдадні Дня Незалежнасці спіс салдат і
мірных жыхароў, якія загінулі ў гады вайны і былі пахаваны як невядомыя, а ў
выніку пошукавай работы знойдзены, папоўніўся. Дзякуючы рабоце пошукавых атрадаў
спецыялізіраваных вайсковых часцей, а таксама пошукавікаў-школьнікаў падняты з
зямлі астанкі ахвяр фашызму на тэрыторыі Ясенскага, Лапіцкага і Дараганаўскага
сельсаветаў. Робіцца гэта з той мэтай, каб нямыя сведкі ўстрывожаных магіл —
рэшткі абмундзіравання, медальёны, даваенныя манеты і інш., дапамаглі хоць
што-небудзь расказаць пра загінуўшага чалавека, даведацца яго прозвішча. А яшчэ
— каб аддаць даніну павагі за баявы подзвіг перад тым, як пасля перазахавання
ён знойдзе сваё апошняе прыстанішча: хто — на вясковых могілках, хто — у
брацкай магіле…

Днямі прадстаўнікі раённай і мясцовых улад,
працоўных калектываў і многія жыхары станцыі Ясень, пасёлка Сасновы і вёскі
Дараганава сабраліся на жалобныя мітынгі-рэк-віемы, якія прайшлі ў гонар тых,
чые астанкі былі знойдзены пры раскопках: невядомага салдата, загінуўшага ў
гады вайны побліз вёскі Люлева, сям’і старшага лейтэнанта Яськова, якая была
пахавана ў вёсцы Ручэй, а таксама 12 удзельнікаў ваенных дзеянняў, якія
адбываліся на дараганаўскай зямлі. Дарэчы, захаванні апошніх знойдзены,
дзякуючы трохгадовай рабоце пошукавага атрада “Узлёт”, якім кіруе дырэктар
мясцовага края-знаўчага музея Жанна Караленя.

Падчас мітынгаў паўсюдна быў выстраены ганаровы
каравул, у выкананні ваеннага аркестра гучала жалобная музыка, школьнікі чыталі
вершы на патрыятычную тэматыку. Усе тыя, каму было дадзена слова, успаміналі
гады страшнага ваеннага ліхалецця, гаварылі пра мужнасць беларусаў, якія разам
з іншымі народамі былога Савецкага Саюза змагаліся на франтах, у партызанскіх
атрадах і падполлі, выкоўвалі перамогу ў тыле ворага, а свя-шчэннаслужыцелямі
прачытаны малітвы за супакой душ загінуўшых.

…Хвіліна маўчання. Астанкі пад гукі жалобнай
музыкі апускаюцца ў магілы, гучаць аўтаматныя залпы. Удзельнікі жалобных
мітынгаў ускладаюць вянкі і кветкі.

Вечная памяць!