Больш за 10 гадоў Яўгеній Назараў працуе геадэзістам.

Бадай кожны хоць раз сустракаў на вуліцы ці будоўлі чалавека с трыногай, які старанна разглядае мясцовасць праз аптычны прыбор, што нагадвае фота- ці кінакамеру. Гэта геадэзіст за будзённай справай.

Адным з такіх спецыялістаў з’яўляецца Яўгеній Назараў. Асіпаўчанін па нараджэнні, пасля атрымання адпаведнай адукацыі ён вярнуўся ў родны горад, каб займацца яго добраўпарадкаваннем.

Каля дзесяці гадоў працуе ў ТАА “Асіповічыгазбуд”. Без справы не сядзіць: пры будаўніцтве любога аб’екта задзейнічаны для забеспячэння геадэзічнага кантролю размяшчэння розных вузлоў і камунікацый.

Яго работа цесна звязана з камандзіроўкамі, бо аб’екты, на якіх працуе “Асіповічыгазбуд”, раскіданы па ўсёй краіне. Асабліва падабаюцца Яўгенію Міхайлавічу паездкі ў гарады з цікавай гісторыяй. Такім чынам, напрыклад, пашанцавала пазнаёміцца са старажытным Туравам. Нярэдка трубаправоды праходзяць праз лясы, палі і лугі. Зносіны з беларускай прыродай таксама геадэзісту даспадобы.