Тое, што нашы вагонабудаўнікі не вераць у “лічбавыя забабоны”, — рэальны факт: менавіта 13 студзеня войдзе ў гісторыю прадпрыемства як дзень выпуску 500-га вагона.

— Гэта для калектыву істотнае дасягненне, — адзначыў на міні-ўрачыстасці генеральны дырэктар СЗАТ “Асіповіцкі вагонабудаўнічы завод” Мірза Чалаян. — Работы па розных накірунках тут распачаліся даўно, але вытворчасць на першы план выйшла практычна летась, таму і выпуск “пяцісотага” — падзея знакавая, пацвярджае, што мы сталі сапраўдным сучасным прадпрыемствам. Ужо заключаны кантракты на выпуск 700 вагонаў — 500 цыстэран і 200 платформ. І гэта — не мяжа, спыняцца на дасягнутым ніхто не збіраецца, задача перад заводам простая: працягваць расці, дынамічна развівацца і нарошчваць магутнасці. Моцнага ўсім здароўя, шчасця і дабрабыту. І яшчэ раз, паважаныя завадчане, словы ўдзячнасці за цярпенне ў цяжкія хвіліны, разуменне і падтрымку, добрасумленную адданую працу.

Многія з выступаючых, як і другія “бацькі” народжанага “імянінніка”, узгадалі ў той дзень самыя розныя перыяды станаўлення АВЗ на ногі. Фарміраванне калектыву і фінансавыя праблемы, станаўленне вытворчасці і нявер’е асобных у паспяховае пераадоленне цяжкасцей — хапала ўсяго. Лейтматыў жа такі: “Галоўнае — мы разам, адзінае цэлае, жыццёвую праверку на трываласць прайшлі, а значыць і з вызначанымі задачамі справімся”.

…Урачысты мітынг скончыўся, а вагонабудаўнікі ўсё падыходзілі да “пяцісотага”, каб сфатаграфавацца на яго фоне на памяць: заслужаны гонар чалавека, які ўклаў і сваю часцінку працы ў стварэнне сімпатычнага “юбіляра”-працаўніка. А не паспеем азірнуцца, як будзем вітаць і “тысячніка”!