Усё, звязанае з сустрэчай Новага года, адыходзіць у гісторыю, і цяпер спакойна, без мітусні, можна зайсці ў любы магазін і набыць патрэбныя тавары. Якія ж вынікі пераднавагодняга пакупніцкага ажыятажу?

У ААТ “Гандаль” паведамілі, што за апошнія 10 дзён снежня тавараабарот склаў амаль 3,5 мільярда рублёў. Выручка райста — 2,1 мільярда. Па словах галоўнага эканаміста таварыства, перад святам значна павялічыўся продаж садавіны і гародніны: рэалізавана аднаго і другога разам больш за 20 тон, а летась — каля 12. Таксама папулярнасцю ў пакупнікоў карысталіся залатыя вырабы. Што ж тычыцца “Еўрагандлю” — адной з буйнейшых арганізацый у сферы, то напярэдадні свят там яблыку не было дзе ўпасці. Які тавара-абарот? У абедзвюх іх крамах тавараў прададзена на 5 мільярдаў рублёў. Як звычайна, хітом продажаў сталі мандарыны, ананасы і шампанскае. 91,5 мільёнамі папоўніўся мясцовы бюджэт і ад праведзеных 24 і 30 снежня гарадскіх кірмашоў. Прыбытак прынеслі выстаўкі-продажы кулінарнай, кандытарскай прадукцыі і мясных паўфабрыкатаў — 95 мільёнаў, з іх — 43 прыходзіцца на ААТ “Жэлдорсэрвіс г. Магілёў”.