Галоўным
пытаннем на сельгаснарадзе з разглядам вынікаў работы ў жывёлагадоўлі, якая
прайшла ў аўторак, была падрыхтаванасць ферм да стойлавага перыяду. Старшыня
райвыканкама Пётр Шукаловіч падкрэсліў, што пераходзяць фермы на зімовы рэжым
неарганізавана. Стойлавы перыяд падразумявае шэраг змяненняў, у тым ліку і ў
рацыёне кармлення. Гэтае пытанне разглядзелі падрабязней. Пры дастатковай
наяўнасці разнастайных кармоў у многіх гаспадарках кормяць жывёлу
незбалансавана, яшчэ не адкрывалі ямы з сенажом. Аб якіх прыбаўках пры такім
раскладзе можа ісці размова? Кіраўнік раёна падкрэсліў, што пастаянна павінна
быць у полі зроку і будаўніцтва новых ферм. Неабходна павялічыць тэмпы работ:
чым хутчэй новабуды пачнуць эксплуатавацца, тым раней будзе ад іх аддача.

Выязная частка
закранула дзве гаспадаркі. Першымі наведалі жывёлагадоўчыя аб’екты СВК “Калгас
“Ясень” — фермы ў вёсках Матавіла, Заельнік і Асяродак. Паўсюдна меліся
заўвагі: неналежны санітарны стан тэрыторый і кароўнікаў, хібы ў рацыёне
кармлення, адсутнасць патрэбнай дакументацыі, няўтульнасць бытавых памяшканняў.
З плюсаў можна назваць утрыманне ў Заельніку бычкоў мясной пароды
абердзін-ангусаў — жывёла дагледжаная і ўкормленая.

У СВК “Калгас
“Бярэзіна” паглядзелі не толькі ферму ў Копчы, але і мех-двор у Красным. Тут
таксама не абышлося без істотных заўваг і па пастаноўцы тэхнікі, і па рамонтнай
майстэрні. Начальнік райсельгасхарчу Міхаіл Поклад звярнуў увагу кіраўнікоў
усіх сельгаспрадпрыемстваў, каб аналагічныя недахопы пры іх наяўнасці былі
ліквідаваны паўсямесна.

Як спрацаваў
раён у верасні? У “малочным” плане гэта зноў быў не лепшы месяц: вытворчасць
малака склала 98,2%. І хоць валавая прывага адпавядала 109%, гэта ўсё роўна
менш, чым патрабуецца для выканання прагнознага паказчыка. Што тычыцца
канкрэтна гаспадарак, то самая высокая вытворчасць малака ў першым восеньскім
месяцы была ў “Лапічах” — 114% і “Бярэзіне” — 109, а самая нізкая — у
“Асіповічыагра-прамтэхзабеспячэнні” — 81,3%. Лепшыя надоі на карову ў “Новым
шляху” — 494 кілаграмы, філіяле “Белшына-агра” ААТ “Белшына” — 475. Сама менш
малака ў верасні далі рагулі ў калгасе імя Чарняхоўскага — 287 кілаграмаў і
“Каўгарскім” — 285. Самыя высокія валавыя прывагі буйной рагатай жывёлы ў
філіяле “Белшына-агра” — 131,6%, “Лапічах” — 129,3, “Бярэзіне” — 119,4.

Прыемным
момантам стала падвядзенне вынікаў раённага агляду-конкурсу на лепшую работу па
стварэнні ўмоў працы і вытворчага быту на жывёлагадоўчых фермах і машынных
дварах. Дыпломы і каштоўныя падарункі ад райкама прафсаюза работнікаў АПК былі
перададзены калектывам малочнатаварнай фермы “Малая Грава” СВК “Калгас “Чырвоны
ўдарнік” (загадчыца — Вольга Невяроўская) і машыннага двара СВК “Калгас “Новы
шлях”.

Валянціна
КОРБАЛЬ.