На апошняй сельгаснарадзе з разглядам формы-24, якая прайшла ў аўторак, была
падведзена канчатковая рыса пад вынікамі работы ў жывёлагадоўлі за 2011 год.
Старшыня райвыканкама Пётр Шукаловіч адзначыў, што гэты перыяд быў не асабліва
плённым: насупраць усіх асноўных паказчыкаў — а гэта вытворчасць малака, яго
рэалізацыя, сярэдні ўдой ад каровы — стаіць знак “мінус”.

Возьмем хаця б апошні. Летась ад кожнай каровы ў
гаспадарках раёна атрымалі па 4.761 кілаграму малака — на 444 менш, чым за
аналагічны паказчык 2010 года. Прычыны? Iх шмат. Многія сельгаспрадпрыемствы
наракалі на якасць кармоў. Што ж, час пакажа, ці толькі ў кармах справа. Тым
больш, што за мінулы сезон у дастатку нарыхтавана добрых кармоў, хапае зараз і
канцэнтратаў. Значыць, можна чакаць прыбавак? Не варта забываць, што на малако
ўплывае і распарадак дня, і выкананне рацыёнаў, і санітарныя ўмовы.

Кіраўнік раёна пад-крэсліў, што да жывёлы трэба
ставіцца беражліва, не дапускаць невытворчага выбыцця кароў. Невыкананне
“мяса-малочных” планаў не зусім зразумелае яшчэ і таму, што раён добра
ўкамплектаваны спецыялістамі. Гаварыў старшыня райвыканкама і аб мадэрнізацыі
малочнатаварных ферм, рамонце тэхнікі і размеркаванні пасяўных плошчаў. Варта
аддаць сёлета больш увагі прадукцыйнасці сенажацей і пашаў. Словам, трэба, каб
было больш аддачы ад працы, а сама работа стала больш арганізаванай,
мэтанакіраванай і якаснай.

На гэты раз вырашылі наведаць некалькі ферм
розных гаспадарак. Першым аб’ектам стала МТФ “Паплавы” ААТ “Пратасе-вічы”.
Асноўная заўвага, якая тут была зроблена, — скапленне гною на выгульнай
пляцоўцы. Сельгаспрадпрыемству дадзена некалькі дзён на ліквідацыю
недапрацовак. Наогул, зараз гаспадарка перажывае складаныя часы: у хуткім часе
“Пратасевічы” будуць рэарганізаваны і далучаны да ААТ
“Асіповічыаграпрамтэхзабеспячэнне”. I сёння важна, каб працэс гэты прайшоў
планамерна і без усякіх “сюрпрызаў”.

Пабывалі на МТФ у Крынцы калгаса “Каўгарскі”.
Тут санітарныя ўмовы створаны належныя, аднак важкіх падстаў хваліц-ца
прадукцыяй ферма не мае.

У СВК “Калгас імя Чарняхоўскага” наведалі два
сельгасаб’екты — у Заняцеччы і ў Дрычыне. На першай ферме для ўтрымання жывёлы
прыстасавана памяшканне для захавання сена, і гэта дазволіла пазбегнуць
скучанасці жывёлы. Ёсць тут над чым папрацаваць у плане захавання старых
пабудоў.

Нядрэннае ўражанне пакінула ферма ў Дрычыне.
Аднак таксама хацелася б, каб ад яе была большая аддача. У гаспадарцы ўсё яшчэ
самыя нізкія надоі — за мінулы год тут надаілі 3.182 кілаграмы ад каровы, тады
як філіял “Белшына-агра” ААТ “Белшына”, напрыклад, атрымаў 5.841 кілаграм.
Праўда, і там не абышлося без мінуса.

“Мы і надалей будзем імкнуцца наведваць менавіта
аддаленыя невялікія фермы, — падкрэсліў начальнік райсельгасхарчу Міхаіл
Поклад. — Па іх стане і можна дакладна вызначыць, як рэальна ідуць справы ў
гаспадарцы”.

На пленарным пася-джэнні агучылі шэраг задач на
2012 год. Адказ трымалі гаспадаркі, якія “цягнуць” раён назад. “Лапічы”
тлумачылі, чаму ў калгасе ўжо каторы месяц жывёла мае нізкія прывагі. Так, за
снежань штодня свінні прыбаўлялі ўсяго па 280 грамаў. Аказваецца, сярод гадаванцаў
распаўсюджаны за-хворванні. У “Карытным” з-за неналежнага ўтрымання буйная
рагатая жывёла ў мінулым месяцы за суткі плюсавала толькі па 372 грамы — на 246
менш, чым за адпаведны леташні перыяд! “Ясень” трымаў адказ не толькі за
малако, але і за тое, што мінулым жнівом не змог нарыхтаваць свайго насення. I
гэта пры тым, што сёлета перад раёнам стаяць грандыёзныя планы — атрымаць 40
тысяч тон збожжа…

 Безумоўна, на нарадзе, дзе былі сабраны
кіраўнікі і спецыялісты гаспадарак, старшыні сельсаветаў і прадстаўнікі іншых
зацікаўленых арганізацый-партнёраў, аказаліся закранутымі не толькі пытанні
жывёлагадоўлі. Прыйшоў час не проста запісваць пастаўленыя задачы ў блакнот,
але і неадкладна прыступаць да іх рашэння.

За
2011 год у раёне:

Вытворчасць
малака — 333.457 цэнтнераў (-7.396) — 97,8%.

Рэалізацыя
малака — 276.253 цэнтнеры (-5.930) — 97,9%.

Колькасць
буйной рагатай жывёлы — 22.992 галавы (+1.728) — 108,1%.

Надой
на 1 карову:  філіял “Белшына-агра” ААТ
“Белшына — 5.841 (-789), СВК “Калгас “Новы шлях” — 5.620 (-198), ААТ
“Асіповічыаграпрамтэхзабеспячэнне” — 5.534 (-452).

Валянціна КОРБАЛЬ.