Ведаеце сакрэт паспяховага дня? Трэба з самай раніцы думаць аб тым, што цікавага чакаецца ў бліжэйшыя гадзіны. Верагодна, так і зрабілі ўдзельніцы клуба даярак 6 сакавіка, таму што на сваю чарговую — ужо дзявятую! — сустрэчу з’явіліся пры поўным парадзе і ў добрым настроі.

Аператараў, якія надаілі летась больш за 6.000 кілаграмаў малака ад каровы, на Асіповіччыне нямала. I ўжо традыцыйна найбольшая колькасць такіх працаўніц у філіяле “Белшына–агра” ААТ “Белшына”. Гэта Алена Лук’яненка, Таццяна Вярбіцкая, Лідзія Аліноўская, Наталля Крывенка, Лідзія Данільчык, Сняжана Жуковіч, Таццяна Меранкова. “Авангард” прадстаўляла Алена Кілбас, “Лапічы” — Алена Гарадзецкая, ААТ “Асіповічыаграпрамтэхзабеспячэнне”
— Таццяна Шалгун і Алена Шашок. Гэтыя руплівыя жанчыны на ўрачыстасці атрымалі Падзячныя лісты старшыні райвыканкама і грашовыя прэміі, якія ўручыў начальнік упраўлення сельскай гаспадаркі і харчавання Віктар Стурліс. Ушаноўваць даярак на раённым узроўні яму давялося ўпершыню, і ён гэта зрабіў з асаблівым задавальненнем. Падзякаваўшы за шчырую працу і выказаўшы спадзяванне, што на наступны год вынікі будуць яшчэ лепшымі. Зараз штодня валавая вытворчасць малака ў раёне складае каля 90 тон, і тут немалая заслуга менавіта “шасцітысячніц”. Пэўныя надзеі ўскладаюцца і на бліжэйшую будучыню, калі пачнуць уводзіцца ў строй новыя фермы з сучасным абсталяваннем.

Да віншаванняў і пажаданняў далучылася і старшыня райкама прафсаюза работнікаў АПК Святлана
Сідарэнка, якая і ўручыла шэрагу працаўніц калгасных ферм кветкі і падарункі.

На працягу мерапрыемства разнастайныя канцэртныя нумары паказваў народны ансамбль народнай песні “Вечарынка” Ялізаўскага Дома культуры, якім кіруе Анатоль Пятраеў. У запрошаных на свята была магчымасць трымаць першынство і ў шматлікіх конкурсах і гульнях.

Ну і, канечне, не абышлося свята без прысмакаў–пачастункаў. Тут да асноўнага арганізатара сустрэчы — райкама прафсаюза АПК — далучыліся філіял “Асіповіцкі” ААТ “Бабушкина крынка” і РДУВП “Асіповіцкі хлебазавод”.

Валянціна КОРБАЛЬ.