За мінулы год працаўнікам
лакаматыўнага дэпо не сорамна: планавыя паказчыкі выкананы паспяхова. А дзеля
таго, каб спраўляцца з вытворчымі заданнямі, трэба мець і граматных
спецыялістаў, і наогул дружны калектыў аднадумцаў. І ў дэпо, як сведчыць
Валерый Лайшаў, ён ёсць. На пасадзе начальніка Валерый Уладзіміравіч ужо 23
гады, ведае тут усё, як гаворыцца, і ўсіх, і за сказанае слова заўсёды прывык
адказваць.

— Сёння ў нас працуе 530
чалавек, з якіх 174 машыністы і 111 іх памочнікаў, — расказаў кіраўнік. —
Узрост першых вагаецца ў межах 40-50 гадоў, другіх — ад 18 да 30. І яны, і
наогул абсалютная большасць — людзі надзейныя, справу ведаюць дасканала, усё
даручанае выконваюць з належнай адказнасцю. Ды і кіраўніцтва са свайго боку
стараецца рабіць усё, каб работнікі павышалі сваю кваліфікацыю, удасканальвалі
майстэрства. Сёння ў Белдзяржуніверсітэце транспарту завочна вучыцца 22
дэпоўца, яшчэ 6 — у тэхнікумах.

Тых, хто выдатна працуе, у
нас багата, а адсюль і вынікі. За год, да прыкладу, маем значную эканомію
паліва-энергетычных рэсурсаў. Машыністы электравозаў сэканомілі на 27 мільёнаў
рублёў электраэнергіі — і тут добрым словам трэба найперш успомніць Сяргея
Вашчанку, Сяргея Падгорнага і Аляксандра Пяшко; эканомія дызпаліва склала 294
мільёны — тут наперадзе Уладзімір Мельнік, Міхаіл Дземідовіч і Анатоль Века.
Паказчык перавозак — 104,8%, прадукцыйнасць лакаматыва — 100,3%, яго прабег —
102,9%. Летась нашы машыністы правялі 40.078 грузавых паяздоў, тады як у 2009
годзе — 35.925.

Даход ад рэалізацыі
прадукцыі, работ, паслуг у дэпо перавысіў 49,7 мільярда — 110,5%,
рэнтабельнасць склала 3,5%, прыбытак за год — амаль 1,7 мільярда рублёў, чысты
— 40 мільёнаў.

Карацей, лічбаў можна
прыводзіць багата, і за кожнай з іх заўсёды трэба бачыць чалавека працы. І мы
ганарымся, што знакам “Выдатнік Беларускай чыгункі” ўзнагароджаны
машыніст-інструктар Аляксандр Ефімовіч і па выніках года атрымаў падзяку
начальніка дарогі Эдуард Дзенісенка, што маем чатыры працоўныя дынастыі, якія
ўжо перавысілі векавы рубеж: 141 год адпрацавалі ў дэпо Задолі, 127 — Фядосавы,
118 — Сікорскія, 102 — Грыцаевы, што ёсць такія выдатныя работнікі, як
машыністы дызель-цягнікоў Васіль Чаропка, Вацлаў Весялоўскі і многія другія. З
такімі людзьмі і рабіць прыемна, і вызначаныя задачы вырашаюцца паспяхова.

Георгій АЛЕЙНІКАЎ.