Вуліца Інтэрнацыянальная ў Асіповічах мае ўсе падставы, каб называцца Чыгуначнай.

Па-першае, месціцца яна абапал сталёвай магістралі. Па-другое, тут знайшлі прапіску шматлікія адміністрацыйныя памяшканні чыгуначнікаў. Плюс, кожны гараджанін адкажа на пытанне, дзе знаходзіцца паравоз-помнік. А яшчэ — гэта сетка гандлёвых кропак. Большасць з іх належыць Асіповіцкаму філіялу ААТ “Жэлдорсэрвіс            

г. Магілёў”. Праўда, многія ведаюць яго як “ОРС”, які вядзе сваю гісторыю з 30-х гадоў мінулага стагоддзя. 18 гадоў ім кіруе Любоў СЯДОВА — чалавек мэтанакіраваны, ініцыятыўны, здольны весці за сабой людзей і дабівацца пастаўленых мэт. Гэта пацвярджае і факт, як тут спрацавалі летась.

— Функцыі нашы засталіся ранейшымі, — гаворыць Любоў Міхайлаўна. — Уваходзім у структуру абласнога падпарадкавання. Маем 16 магазінаў, у тым ліку ў Слуцку, Старых Дарогах, Урэччы. Папулярнасцю карыстаюцца і кафэ № 7, “Дарожнае”. Ёсць яшчэ два міні-кафэ ў раёне вакзала. Ганарымся і цэхам грамадскага харчавання, прадукцыю якога насельніцтва пастаянна запытвае.

— Каб усе аб’екты працавалі стабільна і прыносілі прыбытак, патрэбен зладжаны калектыў. Так?

— Безумоўна. Дабівацца станоўчых вынікаў можна толькі з людзьмі, якія добра ведаюць справу, адказна ставяцца да выканання пастаўленай задачы. І абавязкова, каб чалавек не проста адбываў рабочы час, а працаваў на вынік, быў ініцыятыўным, з павагай адносіўся да спажыўцоў і таварышаў па працы. Інакш можна згубіць патэнцыяльных пакупнікоў, якія пойдуць у другія магазіны, дзе культура абслугоўвання значна вышэйшая. Таму, як кіраўнік, раблю ўсё для таго, каб мае 130 падначаленых, з якіх 80% людзі сярэдняга ўзросту, адчувалі ўпэўненасць у заўтрашнім дні, каб на работу і дамоў ішлі з добрым настроем. Гэта нялёгка ў наш час, калі існуе спакуса ўладкавацца на работу ў іншыя месцы, дзе абяцаюць большы заробак.

— На якія рычагі націскаеце, каб абысці, як кажуць, калег па цэху?

— З усімі падтрымліваю добрыя адносіны, “тапіць” паплечнікаў па працы не маё крэда, аднак здаровая канкурэнцыя толькі на карысць. Дабіцца добрых вынікаў дапамагло некалькі прадуманых хадоў. А канкрэтней — стаўку зрабілі на прадукцыю цэха грамадскага харчавання. Пры гэтым выдатна вывучылі попыт спажыўцоў і прапанавалі ім якраз тую прадукцыю, якой не было ў іншых. Напрыклад, мясныя паўфабрыкаты. І — выйгралі.

Улічваючы сітуацыю з развіццём інфармацыйных тэхналогій, у снежні адкрылі магазін “Мегабайт” па продажы камп’ютарнай тэхнікі і тавараў, якія ёй спадарожнічаюць. Не памыліліся, тавараабарот значна павялічыўся.

— Што яшчэ дапамагае рухацца наперад?

— Пастаянна шукаем свайго пакупніка, стараемся працаваць па заяўках, устанаўліваем нацэнку ў залежнасці ад попыту, напрацоўваем сродкі, каб можна было рэарганізаваць магазіны, надаць ім сучасны выгляд. Гэта азначае ў тым ліку і пераход на самаабслугоўванне з заменай тэхналагічнага абсталявання. Наперадзе, напрыклад, мадэрнізацыя крамы па вуліцы Крыловіча, 5а.

— Некаторыя эканамічныя паказчыкі назавеце?

— Рознічны тавараабарот цэха грамадскага харчавання — 1 мільярд 539 мільёнаў рублёў, валавыя даходы — 3.627 мільёнаў, прыбытак ад рэалізацыі — 201 мільён, чысты прыбытак — 20 мільёнаў рублёў.

— А хто з працаўнікоў заслугоўвае добрых слоў?

— Сярод іх — загадчыкі магазінаў Людміла Машкарова, Святлана Скрыганава, Рэгіна Мефед, базы — Ларыса Блізнец, гандлёвага комплексу — Раіса Маслакова, секцый — Валянціна Савіна, Наталля Ісакава, прадаўцы Аксана Вайцяшонак, Валянціна Мацюшонак, Ганна Нішт, Наталля Кліш, Тамара Мазалава, повар Таццяна Саковіч, вадзіцель Мікалай Елізаранка, галоўны бухгалтар Ларыса Дзеньгіна. I гэта, канечне, далёка не ўсе, вартыя ўдзячнасці за працу.

— Значыць, галоўным лічыце для сябе…

— На працы — арганізаваць такую атмасферу, каб людзі не шукалі іншага месца работы, дапамагчы ім справіцца з любымі праблемамі. А ў жыцці — разуменне і падтрымка блізкіх і сяброў. Пры гэтым  адносіцца да ўсіх трэба з любоўю і клопатам.