Цэх дахавых і гідраізаляцыйных матэрыялаў можна смела назваць галоўным звяном у вытворчым ланцугу СП ААТ “Дах”. Менавіта тут вырабляецца каля 85% валавога аб’ёму прадукцыі прадпрыемства, у тым ліку і добра вядомыя ў нашай краіне і за яе межамі бітумна-палімерныя матэрыялы на негніючай аснове — “Біпалікрын”, “Тэхнаэласт”, “Уніфлекс”, “Элакром”…

У студзені і лютым у прасторных памяшканнях цэха стаіць цішыня: тэхналагічнае абсталяванне, якое дзесяць месяцаў працавала на поўную магутнасць, спыняецца для прафілактыкі і бягучага рамонту.

Каб чарговы сезон прайшоў без зрываў, машыны і ўстаноўкі, на якіх “нараджаецца” руберойд, трэба, бадай, цалкам разабраць і замяніць усе падшыпнікі, цэпы і мноства іншых, адпрацаваўшых рэсурс, вузлоў.

Значную частку рамонтных работ калектыў цэха выконвае ўласнымі сіламі, і, як прызнаецца інжынер па падрыхтоўцы вытворчасці Віктар Зайцаў, спраўляецца з пастаўленымі задачамі не горш, чым з выпускам высакаякаснай прадукцыі. А інакш, напэўна, і нельга: калі даглядаеш тэхніку, на якой потым будзеш зарабляць сабе грошы, абавязкова пачнеш укладваць душу ў заварочванне кожнай гайкі, не кажучы ўжо пра больш адказныя аперацыі.