І ў будні, і ў
святы з ранку да вечара па нашым горадзе ў розных напрамках курсіруе грамадскі
транспарт. Прадстаўлены ён у асноўным аўтобусамі дзяржаўнага прадпрыемства
«Аўтапарк № 19”. Але вось ужо амаль 10 гадоў транспартныя паслугі гараджанам
аказвае і прадпрымальнік Віктар Салагуб.

— Ідэя з
арганізацыяй такога бізнесу ўзнікла неяк сама сабою, — гаворыць Віктар
Уладзіміравіч. — На той час у мяне ўжо быў назапашаны вопыт вадзіцеля: пэўны
час працаваў на гарадскім аўтобусным маршруце. Дзякуючы гэтаму добра ведаў
попыт насельніцтва ў падобным відзе паслуг. Прыкмеціў, што асабліва ў выхадныя
дні народу цяжка дабрацца з рынку ў цэнтр і наадварот. Адна з прычын — вялікія
інтэрвалы паміж курсіруючымі аўтобусамі. Вось і вырашыў паспрабаваць сябе як
індывідуальны прадпрымальнік у сферы пасажырскіх перавозак. Перша-праходца, як
правіла, набівае многа гузакоў. Я не стаў выключэннем. Але, выканаўшы ўсе
неабходныя працэдуры па афармленні дакументаў, узгадніўшы некаторыя пытанні з
аўтапаркам, усё ж такі аформіўся вадзіцелем маршрутнага таксі. Напачатку ў мяне
на службе быў адзін мікрааўтобус, з часам набыў яшчэ машыну. Зараз
прадпрыемства абслугоўвае два маршруты: №№ 7 і 12, якія звязваюць самыя
запатрабаваныя ў землякоў месцы — вакзал, паліклініку, бальніцу і рынак.
Існуюць яны як дапаўненне да гарадскіх аўтобусаў з аналагічнымі лініямі і
робяць грамадскі транспарт горада больш зручным.

— Чым
адрозніваецца праца вадзіцеляў на прадпрыемствах розных форм уласнасці?

— У любым
выпадку ад іх патрабуецца сапраўднае майстэрства, высокая дысцыплінаванасць у
пытаннях захавання правілаў дарожнага руху і камунікабельнасць. Але розніца ўсё
ж ёсць: маршруткі рухаюцца па горадзе з большай хуткасцю. Гэты факт для
пасажыраў, якія прывыклі эканоміць час, або проста для тых, хто кудысьці
спазняецца, іграе важную ролю.

— Некалькі слоў
пра свой калектыў раскажаце?

— Ён невялікі.
На дадзены момант гэта ўсяго два чалавекі. Тры гады працуе ва-дзіцелем «ГАЗелі”
Аляксей Астраух. Хлопец разумее ўсю адказнасць за справу, якой займаецца.
Старанна сочыць за тэхнічным станам машыны, ветлівы з пасажырамі. Словам, яму
можна давяраць…

Параўноўваючы
Асіповічы з іншымі гарадамі краіны, дзе існуюць маршрутныя таксі, адзначу, што
шырокага распаўсюджання ў нашым горадзе такі від пасажыраперавозак не атрымаў.
Растлумачыць гэта, напэўна, можна тым, што стабільна і ўпэўнена працуюць
гарадскія аўтобусы аўтапарка № 19. Але і шпаркія «ГАЗелі” ПТУП «Салагуб”
знаходзяць сваіх пасажыраў, прапаноўваючы хуткасць і зручнасць.

Ніна ВІКТОРЧЫК.