ААТ “Асіповіцкі малочны камбінат” працягвае
інфармацыйную экспансію на замежны рынак. На буйнейшай у СНД міжнароднай
выставе прадуктаў харчавання, напояў і сыравіны для іх вытворчасці “ПРАДЭКСПА-2011”, якая адбылася ў
сярэдзіне лютага ў Маскве, нашы малакаперапрацоўшчыкі ўвайшлі ў лік пераможцаў
— прадпрыемстваў, якія здольны вырабляць тавар эксклюзіўна высокай якасці.

Падчас выставы праходзіў галіновы конкурс “Лепшы прадукт”, на якім
пацвердзілі свае кандыцыі нашы сухое абястлушчанае малако і лінія сыроў
паўцвёрдых “Чадарок” (адпаведна — залаты і бронзавы медалі), масла
салодкавяршковае тлустасцю 72,5% і 82,5% (дыпломы лаўрэатаў), а дырэктар
камбіната Таццяна Жорава была адзначана медалём “За высокую якасць выпускаемай
прадукцыі”.

Калі ўлічыць, што ў выставе прымалі ўдзел кампаніі
55 краін, якія дэманстравалі каля 1500 узораў сваёй прадукцыі, такі поспех
сапраўды ўмацоўвае пазіцыі малочнага камбіната ў зносінах з гандлёвымі
партнёрамі Расіі, краін СНД і далёкага замежжа. Сёння гэта прынцыпова важна,
таму што ў свеце адчуваецца значны дэфіцыт прадуктаў харчавання, і для
вытворцаў высакаякаснай прадукцыі ў гэтым сегменце міжнароднага гандлю адкрываюцца
вельмі цікавыя перспектывы.