На працягу мінулага года для РДУВП “Асіповіцкі хлебазавод” адным з прыярытэтных накірункаў дзейнасці было павышэнне якасці і пашырэнне асартыменту тортаў. Зразумела, каб хутчэй пераканаць спажыўцоў звярнуць увагу на ўласную салодкую прадукцыю, прадпрыемства паралельна наладзіла даволі маштабную і рознапланавую рэкламную кампанію.

Якім быў першапачатковы эфект узгаданай інфармацыйнай падтрымкі? Найбольш красамоўна аб гэтым сведчыць вынік самага гарачага перыяду ў рэалізацыі кандытарскіх вырабаў — святкавання Новага года і Каляд. Так, у перыяд з 29 снежня 2009 года па 7 студзеня 2010 тортаў асіповіцкай вытворчасці было рэалізавана пры-блізна на 20% больш, чым за аналагічны час годам раней.

Таксама нядрэнна папрацаваў на пашырэнне папулярнасці асіповіцкіх тортаў стол заказаў, праз які спажывец, патэлефанаваўшы па нумарах 22-1-39 ці 22-6-36, можа заказаць выраб нестандартных памераў альбо эксклюзіўна ўпрыгожаны.

Але ж прыцягнуць увагу пакупнікоў гэта толькі палова справы; узнікшы інтарэс трэба яшчэ ўтрымаць і замацаваць. База для дасягнення гэтай мэты закладзена надзейная — усе 22 ужо існуючых гатункаў салодкіх прысмак (да якіх хлебазавод збіраецца дадаць на працягу года як мінімум яшчэ тры) выгадна адрозніваюцца ад прадукцыі канкурэнтаў суадносінамі цана/якасць і ўжываннем выключна натуральных інгрэдыентаў.

Вынікі продажу тортаў за снежань паказваюць, што выбраная хлебазаводам маркетынгавая палітыка цалкам правільная. За студзень аб’ём продажу асіповіцкіх тортаў склаў 169% да леташняга аналагічнага перыяду.

Што тычыцца планаў выпуску тортаў на 2010 год, то яны прадугледжваюць павелічэнне колькасці кандытараў, набыццё новага абсталявання і ўкараненне новых тэхналогій вытворчасці кандытарскай прадукцыі.

Пералічаныя крокі з’яўляюцца неабходнымі для правядзення сертыфікацыі кандытарскай лініі прадпрыемства па сістэме менеджменту якасці СТБ ІSО-9001 і сістэме бяспекі харчовай прадукцыі НАССР. Калі ўзгаданыя мэты будуць дасягнуты, перад асіповіцкімі тортамі адкрыецца рынак прылягаючых раёнаў і, што найбольш важна — рынак Мінска і Мінскай вобласці.