Год беражлівасці АСІПОВІЧЧЫНА: калі мінусы — плюсы
Сельгаспрадпрыемстваў Асіповіччыны, якія летась дасягнулі значнай эканоміі энергарэсурсаў, некалькі. Найбольш ашчадным калгасам можна назваць «Авангард”: пры росце валавой прадукцыі на 11,1% летась тут спажыта электраэнергіі на 26 тысяч кілават менш, чым за 2011 год. Мэтавы паказчык у гаспадарцы склаў мінус 16% пры заданні мінус 5,5. Удалося значна зменшыць спажыванне электрычнасці і калгасам «Лапічы” і «Ясень”. А вось СВК «Калгас «Карытнае” прыбавіў аж 57 тысяч кілават, тады як вытворчасць валавой прадукцыі склала ўсяго 91%. Няма за што пахваліць і «Калгас імя Чарняхоўскага”: мэтавы паказчык
тут плюс 19,4%.
«Авангард” можа быць прыкладам і ў эканоміі прыроднага газу: у 2012 годзе тут праведзена мадэрнізацыя падлогавых сушылак з заменай устарэлых газавых гарэлак
на сучасныя эканамічныя блочныя ГБГ-1,2.
У некаторых сельгаспрадпрыемствах раёна для сушкі зерня выкарыстоўваліся мясцовыя віды паліва, што дазволіла абыходзіцца без пячнога, якое мае высокі кошт. У якасці апалу ўжывалі салому ў СВК «Калгас «Каўгарскі”, ААТ «Асіповічыагра—прамтэхзабеспячэнне”. Аналагічная сушылка зманціравана і ў «Новым шляху”, што дасць магчымасць эканомна расходаваць
рэсурсы ўжо ў бягучым годзе.
Надаецца пэўная ўвага ў калгасах і беражлівым адносінам да водных багаццяў: устаноўлена аўтаматыка на воданапорных вежах у «Бярэзіне”,
«Чырвоным ударніку” і «Авангардзе”.
Ці выканана гаспадаркамі раёна даведзенае заданне па энергазберажэнні ў першым месяцы 2013 года? Так: сту—дзеньскі мэтавы паказчык адпавядае мінус 6,6 пры запланаваных мінус 5. У Год беражлівасці сельгаспрадпрыемствам давядзецца прыкласці нямала намаганняў, каб ён сапраўды стаў узорным у плане ашчаднасці.
