У ліпені
мінулага года на базе СШ № 3 быў праведзены “круглы стол” на тэму
“Энергазберажэнне на мясцовым узроўні ў г. Асіповічы”,
які быў арганізаваны мясцовым экалагічным грамадскім аб’яднаннем “Дзеля жыцця на
Зямлі” і Міжнародным грамадскім аб’яднаннем “Экапраект Партнёрства”. Удзельнічалі
ў ім кіраўнікі навучальных устаноў горада і раёна, якія пазнаёміліся з шэрагам цікавых
навацый у галіне скарачэння энергаспажывання будынкамі жылога і грамадскага прызначэння.
Прапанаваныя метады эканоміі цяпла і электраэнергіі былі сустрэты прысутнымі з энтузіязмам,
што дало спадзяванне на дастаткова шырокае распаўсюджванне агучаных ідэй. Больш
чым праз год “Вытокі” вырашылі праверыць, якую ж карысць даў узгаданы абмен
вопытам.

Расказвае
Святлана Зайцава, навуковы кіраўнік ЭМГА “Дзеля жыцця на Зямлі” і каардынатар рэалізуемага
ў СШ № 3 праекта “Энергаэфектыўны клас — энергаэфектыўная школа”:

— На жаль,
па шэрагу абставін здзейсніць задуманае па-максімуму пакуль не ўдалося. Але сур’ёзныя
справы рэдка робяцца хутка і без пераадолення нечаканых перашкод, таму сёння мы
радуемся поспехам Оршы, дзе праграма павышэння энергаэфектыўнасці будынкаў паспяхова
выконваецца ў кожнай школе, ды працягваем даследча-тлумачальную работу ў маштабах
раёна. Прынамсі, яе вынікамі зацікавіліся і ў Магілёўскім дзяржаўным абласным інстытуце
развіцця адукацыі, так што нашы напрацоўкі будуць распаўсюджвацца і ў маштабах
вобласці.

Праект “Энергаэфектыўны
клас — энергаэфектыўная школа” (аўтары — Ігар Бачкуноў, Крысціна Куляшова і
Павел Татур) быў адзначаны на рэспубліканскім узроўні як адна з лепшых даследчых
работ у накірунку скарачэння спажывання энергарэсурсаў, а распрацаваныя ў ім практычныя
рэкамендацыі былі правераны на групе добраахвотнікаў, якімі сталі каля 200 сем’яў
навучэнцаў СШ № 3.

Якія вынікі
ўжывання розных мер па павышэнні энергаэфектыўнасці дамоў і кватэр маем? Напрыклад,
пераўтварэнне звычайных аконных рам у герметычныя шклопакеты — тэхналогія такога
пераўтварэння апісана ў “АК” № 62 ад 19.07.2011 “Эканомія з… паветра” — павысіла
тэмпературу ў кабінеце хіміі СШ № 3 на 5-9°С.

Вопыт
нашых добраахвотных памочнікаў паказаў, што дыхтоўнае ўшчыльненне рам і іншымі,
больш традыцыйнымі метадамі, дае неблагую эканомію цяпла, толькі іх ужыванне надта
нетэхналагічны і таму марудны працэс. Дарэчы, цалкам пацвердзілася і меркаванне
спецыялістаў у галіне энергаэфектыўнасці будынкаў аб больш высокай якасці драўніны,
з якой зроблены старыя рамы. Чаму так — пытанне асобнае, а вось практычная выснова
з гэтага назірання відавочная: калі ёсць такая магчымасць, іх лепш не мяняць на
новыя, а рамантаваць. Што, увогуле, значна танней, чым набыццё новых рам.

Таксама прыблізна
на 5-7°С павышае тэмпературу ўцяпленне столі ў кватэрах на апошніх і падлогі па
першых паверхах шматпавярховых дамоў.

Прыкметна
скарачаюць страты цяпла і, здавалася б, такія “дробязі”, як павешаны на сцяну
альбо па-кладзены на падлогу дыван (1,5-2°С).

Цікавыя вынікі
былі атрыманы і пры пошуках шляхоў скарачэння спажывання электраэнергіі.
Напрыклад, сям’і, якая жыве ў прыватным доме, з дапамогай імправізаванай устаноўкі
для падагрэву вады сонечным цяплом — яна ўяўляе сабой скручаны ў бухту шланг для
паліву, замацаваны ў сонечным месцы — удалося ўлетку абысціся без нагрэву вады
для паліву і мыцця.

І яшчэ. Пры
гатаванні ежы ў духоўцы, на дно якой пакладзены слой цэглы, удаецца атрымаць эфект
рускай печы: стравы захоў-ваюцца цёплымі амаль на працягу ўсяго дня. Калі ж у дадатак
да ўзгаданай меры эканоміі своечасова выключаць святло ў жылых пакоях, можна знізіць
месячны расход электрычнасці ў 1,5-2 разы!

Прыведзеныя
лічбы здаюцца неверагоднымі? Дык чаму б не праверыць іх слушнасць на ўласным
вопыце?