Шмат якія пытанні разглядаліся на сельгаснарадзе
з абмеркаваннем формы-24. Асаблівая ўвага надзялялася адмоўным момантам: раён
усё яшчэ штодзень недабірае тоны малака ў параўнанні з леташнімі паказчыкамі.
Так, вытворчасць гэтага прадукту за 5 месяцаў склала 98,4%, а за май — 94,3. У
рэспубліканскім спаборніцтве Асіповіччына па выніках першага квартала страціла
свае пазіцыі на 17 пунктаў — адсунулася з 21 на 38 месца. Такога значнага падзення,
як сёлета, не было ўжо даўно…

Якія гаспадаркі даюць самы большы “малочны
мінус”? За мінулы месяц па валавай вытворчасці гэта “Карытнае” — 81,1%, “Ясень”
— 82,8%, калгас імя Чарняхоўскага — 84,6%. Менш за ўсё ад каровы ў апошнім
вясновым месяцы даілі ў “Карытным” — 313 кг (-119), “Каўгарскім” — 324 (-72),
калгасе імя Чарняхоўскага — 343 (-75).

Крыху лепш у маі ішлі справы з сярэднясутачнымі
прывагамі буйной рагатай жывёлы, аднак тэхналагічных паказчыкаў у 750 грамаў не
дасягнула ні адна гаспадарка. Зараз у поўнай меры трэба выкарыстоўваць пашавыя
магчымасці. У паўдзённыя гадзіны, калі на вуліцы спёка і жывёле дакучаюць
авадні, каровы павінны стаяць у хлявах, атрымліваць зялёную падкормку.
Знаходжанне ў гарачыню на вуліцы не мае станоўчага ўплыву.

Начальнік райсельгасхарчу Міхаіл Поклад звярнуў
увагу і на захаванне тэрмінаў і якасці корманарыхтоўкі. За чэрвень
сельгаспрадпрыемствы раёна павінны былі зрабіць першы ўкос з 8.550 гектараў.
Асіповіччына крыху адстае па аб’ёмах у параў-нанні з мінулагоднімі паказчыкамі,
аднак нарыхтоўваемыя кармы лепшай якасці. Нагадаў Міхаіл Віктаравіч кіраўнікам
СВК і аб своечасовай закладцы культурных пашаў. Сённяшняя прадбачлівасць
абернецца ў хуткім часе добрым малаком.

Выязная частка, якая прайшла на базе
“Карытнага”, была прысвечана даследаванню мясцовых палёў — раслінаводства
таксама працуе на жывёлагадоўлю. Што тычыцца ўзгаданай гаспадаркі, то, хутчэй
за ўсё, сёлета тут будзе нядрэнны ўраджай. Наведалі поле, дзе густа каласуе
ячмень “якуб”, насенне якога, дарэчы, бралі ў нашым элітгасе — “Авангардзе”. Ля
Коханаўкі расце азімае трыцікале, ушчыльненае аўсом і вікай — усё пойдзе на
фураж. Упершыню сёлета калгас пасадзіў 3,5 гектары цыбулі, па
6 — капусты і морквы. Агародніна айчынных гатункаў. Радуюць вока і цукровыя
буракі. Канечне, мелі станоўчы ўплыў на расліны правільны догляд, захаванне
тэхналагічных патрабаванняў. Ды і землі тут добрыя. У асноўным гэта нізіны,
віль-гаць захоўваецца нядрэнна.

Многія старшыні сельгаспрадпрыемстваў
скардзіліся, што іх культуры за працяглы перыяд без дажджоў паспелі “пагарэць”
і вялікай аддачы ад ніў чакаць ужо не прыходзіцца. А гэта значыць, аграрыям
трэба яшчэ больш старацца працаваць, каб хоць тое, што залежыць ад чалавека,
выконвалася належным чынам і выпраўляла сітуацыю. Зараз, напрыклад, час якасна
падрыхтаваць тэхніку, якая выйдзе ў пачатку ліпеня на ўборку азімага рапсу.

Валянціна КОРБАЛЬ.