1997.Закладзена “Алея дружбы”. У стаматалагічнай паліклініцы з’явілася абсталяванне для вырабу металакерамічных зубных пратэзаў. Развіваецца тэлефонная сувязь, падключэнне да міжнароднай камунікацыйнай сеткі Internet.

“У Асіповічах з гэтага года пачне дзейнічаць ахоўнае агенцтва “Віцязь” — расказвае ў артыкуле “Рэкету прыйдзецца пасунуцца” П. Кравец: “<…> асноўны касцяк калектыву будуць складаць былыя супрацоўнікі МУС і КДБ”* (№ 1 ад 4 студзеня).

Паводле Дэкрэта Прэзідэнта Рэспублікі Беларусь № 1 устаноўлена дзяржаўнае свята — Дзень Незалежнасці Рэспублікі Беларусь (Дзень Рэспублікі) (№ 2 ад 11 студзеня), якое мы святкуем і зараз 3 ліпеня.

Сярэдняя школа № 4 мела самую вялікую колькасць навучэнцаў — 1 313. У сувязі з гэтым установа працавала ў тры змены (№ 1 ад 4 студзеня). А дзіцячы сад № 4 з’яўляўся адным з буйнейшых у рэспубліцы па колькасці выхаванцаў. Па стану на 1 студзеня яго групы наведвала 372 дзіцяці (№ 2 ад 11 студзеня).

У жыхароў цэнтральнай часткі горада і “Бама”, якія гадамі стаялі ў чарзе на ўстаноўку тэлефона, з’явілася магчымасць атрымаць доступ да сродку сувязі з папярэдняй аплатай: “Тыя, хто ўжо заплаціў азначаную суму, праз паўгода атрымаюць доўгачаканую тэлефонную сувязь. Да ўсяго варта дадаць: такія “льготы” па ўстаноўцы тэлефона могуць скарыстаць чаргавікі, якія сталі на чаргу да 1995 года ўключна” (№ 2 ад 11 студзеня).

У горадзе па-ранейшаму найбольш вострай застаецца жыллёвая праблема, якая звязана са скарачэннем аб’ёмаў дзяржаўнага жыллёвага будаўніцтва і павелічэннем тэрміну атрымання кватэр (“Звароты людзей — барометр іх патрэб”, № 9 ад 5 лютага).

Дзякуючы тагачасным мясцовым спонсарам — акцыянернаму таварыству “Дах”, ААТ “Асіповіцкі малочны камбінат”, “Прыорбанку”, дзяржпрадпрыемству “Радыё”, малому прадпрыемству “Энергія”, арэнднаму гандлёва-вытворчаму прадпрыемству “Асіповічы” — для артапедычнага аддзялення стаматалагічнай паліклінікі набыта абсталяванне для вырабу металакерамічных эстэтычных зубных пратэзаў і лячэння зубоў: “Між іншым, падпісаны дагавор, што ААТ “Дах” выдзеліць стаматалагічнай палі-клініцы 11 тысяч долараў ЗША на набыццё абсталявання і матэрыялаў у тэрапеўтычны кабінет новых тэхналогій у лячэнні зубоў” (№ 9 ад 5 лютага).

“У гэтым годзе павінна пачаць дзейнічаць экалагічная лабараторыя, якая размешчана ў будынку былой кацельні гарадскога вытворчага аб’яднання жыллёва-камунальнай гаспадаркі па вуліцы Гагарына. Цяпер на аб’екце работнікамі будаўнічага ўпраўлення № 89 вядзецца надбудова другога паверху” (№ 12 ад 15 лютага).

На “Баме”, у раёне магазіна “Свіслач”, распачаліся будаўнічыя работы па ўзвядзенню жылога дома на 98 кватэр: “Будучы пяціпавярховы дом будзе мець Г-падобную форму. Акрамя таго, на першым паверсе прадугледжваецца месца для размяшчэння бібліятэкі” (№ 12 ад 15 лютага).

Раённы вузел электрасувязі плануе адкрыць транкінгавую сувязь, якая дазволіць выкарыстоўваць радыётэлефоны, да таго ж ужо цяпер манціруецца вузел пакетнай камунікацыі, што дасць магчымасць уладальнікам камп’ютараў і тэлефоннай сеткі выйсці на міжнародную камунікацыйную сетку Internet (№ 19 ад 12 сакавіка).

Лесаводы Асіповіцкага лясгаса ў чарговы раз атрымалі званне “Лясны гадавальнік высокай культуры”: “З нагоды такога адзначэння дырэктар лясгаса Мікалай Новікаў быў узнагароджаны Ганаровай граматай Мінлясгаса і Беларускага рэспубліканскага камітэта галіновага прафсаюза” (№ 28 ад 12 красавіка).

На заводзе аўтаагрэгатаў пачалі збіраць цалкам сядзенні да аўтамабіляў МАЗ-6430. Да таго ж выпушчана эксперыментальная партыя дыскаў для колаў з алюмінію, якая даволі паспяхова вытрымала выпрабаванні (“Весткі з АЗАА”, № 28 ад 12 красавіка).

Веснавым днём 17 красавіка па ініцыятыве гарадскога аддзела адукацыі і яго загадчыцы Л.І. Маісеенка і арганізатара Р.М. Блізнюк была закладзена “Алея дружбы”: “Уздоўж асфальтаванай дарожкі, якая вядзе да СШ № 1, пасадзілі 170 адзінак дрэў і кустоў” (№ 31 ад 23 красавіка).

Штат работнікаў АП “Асіповіцкі завод “Каммаш” па стану на 1 красавіка складае 230 чалавек. Сярэдняя заработная плата з сацыяльнымі выплатамі за першыя два месяцы бягучага года склала 2 мільёны 392 тысячы рублёў (у доларавым эквіваленце — каля 97 долараў ЗША — аўт.) (№ 31 ад 23 красавіка).

Асіповіцкі завод жалезабетонных канструкцый адным з першых у рэспубліцы прыступіў да ўвядзення на сваім прадпрыемстве перадавых тэхналогій па вырабу энергазберагаючых будматэрыялаў. На вытворчых пло-шчах цэха буйнапанельнага домабудавання ўведзена ў дзеянне адмысловая лінія па вырабу полістыролбетону (П. Жданаў “У рынак з новымі тэхналогіямі”, № 36 ад 14 мая).

У Асіповіцкай гімназіі пабывалі госці з Англіі. “Упершыню яе наведаў прэзідэнт англійскай дабрачыннай арганізацыі “Дзецям Чарнобыля — лінія жыцця” Віктар Міццы” (№ 81 ад 22 кастрычніка).

Прыемна адзначыць, што 28 выпускнікоў сярэдніх школ і гімназіі ўдастоены вышэйшых школьных узнагарод — залатых і сярэбраных медалёў (№ 49 ад 28 чэрвеня).

М. Трусава ў інтэрв’ю са старшынёй спажывецкага таварыства Аляксандрам Ковачам адзначае: “Ва ўласнасці райпа знаходзяцца 93 магазіны, з якіх 64 прадуктовыя, 11 прамысловых, 18 змешаных. <…>. Абарот рознічнага гандлю грамадскага харчавання склаў за 5 месяцаў 1997 года 1 900 мільёнаў рублёў, у параўнанні з мінулым годам ён узрос у 2,5 раза” (№ 51 ад 9 ліпеня).

У Асіповічах адкрываецца першы “маркет”, пра што піша М. Віктарава ў № 51 ад 9 ліпеня: “У чацвёртым квартале бягучага года гарадская сетка магазінаў павялічыцца на адзін, але не зусім звычайны — абсталяваны і зроблены адпаведна еўрапейскім стандартам — маркет. Рашэннем гарвыканкама № 5-37 ад 26.05.1997 г. закрыты ў пачатку года магазін № 34 “Гарызонт” паступіў на баланс асіповіцкага раённага спажывецкага таварыства. <…>. Гандляваць жа тут будуць прадуктовай і прамысловай групай тавараў”.

На тэрыторыі водазабору “Паўднёвы” закладзены сад: “Звыш паўсотні розных пладовых дрэў, як паведаміла кіраўніцтва ДП “Энергія”, пасаджаны ў мэтах карыснага выкарыстоўвання пустуючай зямлі, якая гадамі не мела руплівага гаспадара” (№ 69 ад 10 верасня).

У № 70 ад 13 верасня паведамляецца, што аўташкола пачала новы від перападрыхтоўкі вадзіцеляў — з катэгорыі В на катэгорыю С.

Праводзіцца капітальны рамонт усіх вакзальных збудаванняў: “Акрамя гэтага ў бліжэйшы час і пры пэўных спрыяльных абставінах будзе зроблена на належным узроўні і чацвёртая пасажырская платформа” (№ 72 ад 20 верасня).

Асіповіцкі хлебазавод напярэдадні 125-годдзя горада парадаваў асіпаўчан навінкай: “асвоена новая тэхналогія па выпечцы белабулачнай прадукцыі з дабаўкай соі. Адмысловы хлеб ужо зацверджаны Міністэрствам хлебапрадуктаў рэспублікі” (№ 73 ад 24 верасня).

П. Кравец у артыкуле “Для ачысткі вады” вызначыў адзін з галоўных клопатаў асіпаўчан: “Нядобрая якасць гарадской пітной вады вымушае гараджан шукаць у магазінах бытавыя водаачышчальныя фільтры” (№ 93 ад 3 снежня).

У газеце друкавалася пра-грама чатырох тэлеканалаў: БТ, ОРТ, РТР і “Санкт-Петербург”.

У публікацыі “Горад у фактах” (№ 52 ад 12 ліпеня), паведамлялася, што:

больш за 35-тысячныя Асіповічы займалі 1 954 гектары. З іх 480 гектараў прыходзілася на гарадскія вуліцы, плошчы, скверы і іншыя землі грамадскага карыстання;

найбольш буйны завод — аўтамабільных агрэгатаў, дзе працавала 1 659 чалавек. На АТ “Дах” — 1 424 чалавекі, на камбінаце хлебапрадуктаў — 455, на ААТ “Малочны камбінат” — 281, АП “Асіповіцкі завод “Каммаш” — 223 чалавекі;

чыгуначны вузел аб’ядноўваў 10 прадпрыемстваў. А аўтапарк-19 абслугоўваў пасажыраў на дзесяці гарадскіх маршрутах;

прыватны бізнес прадстаўляюць 36 суб’ектаў гаспадарання і каля 300 прадпрымальнікаў. Усяго ў недзяржаўным сектары занята больш за тысячу чалавек;

у гарадскіх аддзяленнях паштовай сувязі працавала 18 паштальёнаў;

жылля ў Асіповічах налічвалася 635,6 тысячы квадратных метраў, а працягласць вуліц складала 77,3 кіламетры;

у пяці агульнаадукацыйных школах, комплексе дзіцячы дом-СШ-5, гімназіі і спецшколе для дзяцей, хворых на поліяміеліт, каля 500 педагогаў навучалі больш за 6 тысяч дзяцей, у 13 садах выхоўвалася звыш 2 тысяч хлопчыкаў і дзяўчынак;

на тэрыторыі горада размешчаны раённы Цэнтр культуры, гарнізонны Дом афіцэраў, чатыры бібліятэкі, клубы чыгуначнікаў і ААТ “Дах” і два падлеткавыя клубы. Медыцынскае абслугоў-ванне ажыццяўлялі дзве бальніцы, дзве паліклінікі, стаматалагічная паліклініка і чатыры дзяржаўныя аптэкі. У горадзе тры стадыёны, дзесяць спартзалаў, 23 спартыўныя пляцоўкі, пяць ціраў, дзесяць спартклубаў.

* Тут і далей захаваны правапіс першакрыніцы.