Ветэран

Да кожнага — з павагай

Завяршаючы працоўную дзейнасць, многія чыгуначнікі не пакідаюць назаўсёды свае прадпрыемствы, а працягваюць работу ўжо ў складзе ветэранскай арганізацыі. Да такіх адносіцца і Валянціна Лукашова. Дарэчы, на днях споўнілася 10 гадоў, як яна ўзначаліла пярвічку ветэранаў.

І з ускладзенымі абавязкамі спраўляецца выдатна, пацвярджае старшыня савета ветэранаў чыгуначнага вузла Аляксандр Яраш.

Валянціна Іванаўна ахвотна расказвае пра сваіх “падапечных”:

— У нас на ўліку 181 чалавек, з якіх 169 ужо не працуюць. Ёсць ветэран вайны Уладзімір Пірожнік, які пражывае на тэрыторыі Клічаўскага раёна, яму стараемся ўдзяляць больш увагі. На кантролі — адзінокія ветэраны і тыя, хто знаходзіцца асобна ад родных. Іх месца жыхарства — ад Клічаў—шчыны да Салігорска, але стараемся падтрымліваць тэлефонную сувязь і быць у курсе жыцця кожнага.

Сярод нашых пенсіянераў нямала заслужаных работнікаў. Мяркуйце самі: дзевяць чалавек маюць нагрудны знак “Выдатнік Беларускай чыгункі”, чацвёра атрымалі знак “Ганаровы чыгуначнік”, двое — “За добрасумленную працу на Беларускай чыгунцы”. Усе, незалежна ад колькасці заахвочванняў, паважаныя і сумленныя людзі. Стараемся, каб яны адчувалі, што на прадпрыемстве памятаюць і ганарацца імі. Рэгулярна віншуем з дзяржаўнымі і прафесійным святамі, юбілеямі, запрашаем на мерапрыемствы, якія праводзяцца ў раёне і чыгуначным вузле, а каб не парывалася сувязь са стальной магістраллю, выпісваем сваім пенсіянерам газету “Железнодорожник Белоруссии”.

Былыя пуцейцы прынялі актыўны ўдзел у конкурсе “Умелыя ручкі”, свяце ўраджаю, якія праводзіў вузлавы савет ветэранаў. Неаднаразова мы глядзелі фільмы ў мясцовым кінатэатры, арганізоўвалі экскурсіі ў пакой гісторыі чыгуначнага вузла, тыя, хто мае патрэбу, праходзілі курс аздараўлення ў галіновым санаторыі “Дубравенка”.

Стараемся супрацоўнічаць з моладдзю. Сустракаемся з маладымі спецыялістамі, расказваем ім пра свае працоўныя будні. Прымаем удзел у суботніках, разам з працаўнікамі даглядаем мемарыяльны знак у гонар аднаго з кіраўнікоў партызанскага руху на Асіповіччыне Сцяпана Сумчанкі.

Актыўна ўдзельнічаюць у грамадскай рабоце Ірына Сухачова, Ала Шляхціч, Валянціна Еўдакімовіч, Алена Казлоўская і іншыя ветэраны. А Марыя Цвіркоўская прымае ўдзел у канцэртах, якія праводзяцца на чыгунцы.

— Валянціна Іванаўна — з дынастыі чыгуначнікаў, — расказвае Аляксандр Яраш. — Са стальной магістраллю звязана жыццё яе бацькоў і дзяцей. Гэта чалавек, які аддана адносіцца да любой справы і ўсё робіць сумленна. Яна хварэе душой за кожнага члена сваёй пярвічкі. Клопат, павага да людзей, тактоўнасць, сціпласць, жаданне памагчы ўсім характарызуюць лідара ветэранаў ды-станцыі пуці.

Нездарма пярвічка пад яе кіраўніцтвам займала першае месца сярод суполак Магілёўскага аддзялення, а Валянціна Лукашова атрымала званне “Ганаровы ветэран”.