Чыгунка

Дзеля бяспекі

Прыезд рэвізора ў любую ўстанову яшчэ з Гогалеўскіх часоў лічыцца не зусім прыемнай падзеяй, якая выбівае са звыклага рытму. А на мінулым тыдні давялося пераканацца, што з кожнага правіла ёсць выключэнні: на чыгунцы рэвізора сустракалі прыязнымі ўсмешкамі, якія нават медыцынскія маскі не маглі схаваць. Правяраючы — былы калега, які шмат гадоў адпрацаваў на станцыі Асіповічы. Аднак была і яшчэ адна прыемная нагода.

Галоўны дарожны рэвізор па бяспецы руху цягнікоў Беларускай чыгункі Віктар Ціхановіч наведаў Асіповіцкае лакаматыўнае дэпо, якое ўзначальвае Аляксандр Ефімовіч, не толькі з мэтай правядзення інфармацыйнай работы, але і для ўручэння за-служаных узнагарод. Нагрудны знак “За безаварыйны прабег на лакаматыве 1 000 000 км” атрымаў машыніст дызель-цягніка Аляксандр Высоцкі, а яго калега Васіль Барэль удастоены знака “За безаварыйны прабег на лакаматыве 500 000 км”.

Дарэчы, Аляксандр з чыгуначнай сям’і. На стальную магіс-траль прыйшоў яшчэ ў 1976 го-дзе, пачынаў слесарам. Застаў паравозы, але паездзіць на іх, як гэта рабілі яго дзед, бацька і дзядзька, не давялося. Затое на дызель-цягніках ад’ездзіў шмат. Малодшы сын узнагароджанага — таксама Аляксандр і таксама працуе ў складзе лакаматыўнай брыгады. Старэйшы Леанід — у дыстанцыі пуці, але таксама машыніст. Другую такую сям’ю ў горадзе знайсці няпроста!

Яшчэ адзін чыгуначнік ушаноўваўся разам з машыністамі. Аглядчык-рамонтнік вагонаў Аляксандр Жукавец атрымаў Падзяку начальніка Беларускай чыгункі за пільнасць і ўвагу, дзякуючы якім удалося папярэдзіць аварыю. Працуе ў вагонным дэпо ён 14 гадоў. Да работы адносіцца з вялікай увагай, навучыўся аналізаваць стан вагона, мабыць, ужо з дапамогай усіх органаў пачуццяў. Лічыць, што лепш своечасова падкруціць-падціснуць гайкі і балты, чым потым мець незапланаваныя прыпынкі і нечаканыя здарэнні. А яшчэ навучыўся хутка прымаць рашэнні. Сваю работу лічыць па-сапраўд-наму цікавай і не гатоў памяняць яе на іншую. Вось і зараз, аглядаючы адзін з дызель-цягнікоў вытворчасці польскай кампаніі PESA Bydgoszcz SA, якія пачалі курсіраваць па напрамку Асіповічы-Магілёў зусім нядаўна, хутчэй адчуў, чым убачыў штосьці няладнае. Далей дзейнічаў згодна з інструкцыяй: хутка, прафе-сійна і дакладна. Лічыць, што ў гэтым няма нічога незвычайнага: будзённая работа, у якой бяспека пасажыраў і грузаў заўсёды на першым месцы.