Нярэдка даводзіцца чуць нараканні людзей на работнікаў камунальных службаў. Ці звярталіся яны з прэтэнзіяй непасрэдна да тых, хто адказвае за дадзены участак работы? У адказ гучаць розныя адказы, прычым, ёсць проста загадзя незадаволеныя, без аргументацыі. Між тым, кожная заява спажыўца паслуг разглядаецца, ні адно пытанне не застаецца па-за ўвагай. Таму калі нешта хвалюе —звяртайцеся да спецыялістаў адпаведнай службы.

Пра работу са зваротамі грамадзян у ДУКВП «Водаканал» расказвае вядучы юрысконсульт Ганна Панова:

— Сёлета выканалі больш за 4270 заявак насельніцтва, якія падаваліся праз дыспетчарскую службу. Як правіла, якасць работ кліентаў задавальняе.

На 15 верасня паступіла і разгледжана 12 пісьмовых зваротаў, з іх 1 — электронны. Яшчэ 5 ад грамадзян, якія прыйшлі на асабісты прыём да дырэктара. Людзі ідуць і ў райвыканкам — адтуль для рэагавання атрымалі 48 зваротаў.

З якімі пытаннямі часцей звяртаюцца? У 4 выпадках — наконт эксплуатацыі вонкавых сетак водазабеспячэння і каналізацыі, 3 — функцыянавання ўнутрыдамавой каналізацыі. Двое выказвалі нязгоду з налічанай сумай аплаты і г.д.

У залежнасці ад таго, які зварот паступіў, дырэктар дае заданне начальніку ўчастка, майстру або галоўнаму інжынеру разабрацца ў сітуацыі. Афармляецца акт абследавання, затым — выкананых работ, у якім распісваюцца заяўнік і тыя, хто непасрэдна працаваў на аб’екце.

Сітуацыі бываюць розныя — таму і падыход да іх вырашэння адрозніваецца. Калі жыхары скардзяцца на якасць вады або патрабуюць падвесці вадаправод у аддалены населены пункт, то падобнае хутка не вырашаецца, таму даецца адказ з тлумачэннем, што робіцца ў дадзеным напрамку, калі плануецца вырашыць праблему. «Справа» закрываецца толькі тады, калі зроблена ўсё, што патрабавалася і пад сілу прадпрыемству.

Iна ЗАСКЕВIЧ.