ДЭУ № 73

— Вясной усе работы пачынаюцца з навядзення парадку, — гаворыць галоўны інжынер упраўлення Арцём Арцёмчык. — Праводзім механічную ачыстку праезнай часткі і штучных пабудоў ад рэшткаў супрацьгалалёдных матэрыялаў, рамонтную планіроўку абочын, знімаем сігнальныя вехі, усталёўваем сігнальныя слупкі. Акрамя гэтага, працягваем ямачны рамонт і ўбіраем смецце па ўсіх напрамках абслугоўваемых дарог. У сакавіку былі заменены з металічных на ацынкаваныя бар’ерныя агароджы на ўчастках дарог Барысаў-Беразіно-Бабруйск і Асіповічы-Глуск-Азарычы. Прыступілі да замены парэнчавых агароджаў на мосце праз раку Сінюю на дарозе Асіповічы-Баранавічы і пуцеправодзе на дарозе Асіповічы-Свіслач у вёсцы Цяплухі.

УКП ЖКГ

— Зараз укладваем тратуарную дарожку праз парк ад дома № 51 на вуліцы Сумчанкі, — расказвае намеснік дырэктара Сяргей Салавей. — Таксама мяняем бардзюры і дарожкі на дваровай тэрыторыі гэтага дома. У канцы сакавіка работнікі ДЭУ № 73 будуць фрэзераваць дарогу на вуліцы Інтэрнацыянальнай. На вуліцы Ганны Коваль былі заменены бардзюры і выканана дарожка з дробнаштучнай пліткі. Сумесна з ДРБУ № 199 будзем укладваць асфальт на гэтай вуліцы, а таксама ў завулку Кіржыманава і на ўчастках вуліц Ленінскай і Чарняхоўскага.

ДРБУ № 199

— Рамантуем частку дарогі Лапічы-Гоманаўка, пад’езды да вёсак Цяплухі і Агула, — паведаміў начальнік упраўлення Дзмітрый Свіслёнак. — На бліжэйшы час запланавана пакрыццё асфальтабетонам пад’ездаў да вёсак Смык (ад М5) і Вялікая Грава (ад аўтадарогі Н9911), а таксама завяршыць рамонт дарогі Асіповічы-Дараганава. Сёлетняе разводдзе дрэнна паўплывала на дарогі, якія не маюць асфальтабетоннага пакрыцця. Паступова грэйдзіруем іх, аднак гэта справа па-трабуе шмат часу, таму што сукупная працягласць грунтовых і гравійных дарог — каля 300 кіламетраў. Дарэчы, магілёўскае ДРБУ № 59 праводзіць рамонтныя работы моста на 13 кіламетры аўтадарогі Вяззе-Зборск-Лапічы.