Знешні выгляд горада, нібы пазл, складаецца з мноства дробных дэталяў і элементаў. Адзін з такіх — стан будынкаў і іншых архітэктурных форм.

Штогадова праходзіць капітальны рамонт шэрагу пабудоў, у тым ліку і жыллёвага сектара. Напрыклад, у снежні мінулага года работнікі УКП ЖКГ пачалі рамонт інтэрната, размешчанага ў доме № 6 на вуліцы Дзмітрыева. Работы ідуць поўным ходам.

Заменены аконныя і дзвярныя блокі, уся сантэхніка ў санвузлах і на кухнях блокаў, устаноўлены новыя электрапліты.

Некаторыя работы выкананы на 100%, іншыя яшчэ працягваюцца. Самымі працаёмкімі камунальнікі лічаць дэмантаж старой і ўкладку новай кафельнай пліткі на кухнях, на якія патрэбна шмат часу.  Частковую замену сістэмы ацяплення па зразумелых прычынах пачалі толькі пасля заканчэння ацяпляльнага сезона. Зараз ідзе рамонт лесвіц і замена парэнчаў на іх, абнаўленне фасада, замена даху.

Работы вядуцца сіламі трох прадпрыемстваў: асноўны аб’ём выконвае УКП ЖКГ, якому дапамагаюць дзве падрадныя арганізацыі — АУКП “Рем-спецстрой” і ТАА “ЗУБРМонтажСтрой”.

Галоўная складанасць для будаўнікоў заключаецца ў тым, што капітальны рамонт праходзіць без адсялення жыхароў, і гэта акалічнасць уплывае на графік і тэмп работ. Напрыклад, замену водаправода ці каналізацыі можна праводзіць толькі часткамі, каб жыльцы мелі магчымасць карыстацца выгодамі ў суседнім блоку ці на іншым паверсе. Але цяжкасці гэтыя часовыя.

Завяршыць рамонт плануецца ў маі. Абнаўленне зробіць будынак больш утульным і прывабным, а замена акон і сістэмы ацяплення палепшыць энергаэфектыўнасць і, як следства, знізіць расходы на камунальныя паслугі. А значыць, і якасць жыцця насельнікаў павысіцца.