Добраўпарадкаванне

Засыпае лес і сад. Ды ці кожны снегу рад?

Летась многія незадаволена бурчэлі: «Што гэта за зіма, хутка забудземся, як выглядае снег». Сёлета прырода вырашыла выправіцца і нагадаць як пра маразы, так і пра зімовыя ападкі, завеі, завірухі, сумёты — рана яшчэ адпраўляць гэтыя прыгожыя словы ў скарбонку архаізмаў.

Таму работнікі дарожных арганізацый і УКП ЖКГ ужо другі месяц працуюць у напружаным рэжыме. У ДЭУ № 73 расказалі, што спецтранспарт выязджае на дарогі без выхадных, і працаваць людзям даводзіцца па 14-16 гадзін. Тэхніка пакідае гараж у 4.40, калі яшчэ ўсе спяць, і вяртаецца позна ўвечары.

У дыспетчарскай службе прадпрыемства паведамілі, што больш за ўсё снегу давялося ўбраць 4, 5 і 9 чысла. Напрыклад, за адзін толькі аўторак, 9 лютага, было расчышчана 300 км аўтадарог. Брыгады ў складзе 14 чалавек неаднаразова за дзень чысцілі прыпынкі і дарожкі. Для пасыпкі выкарыстана 308 т пясчана-солевай сумесі. На дарогах працавала 7 МАЗаў, 8 трактароў МТЗ, 3 пагрузчыкі, грэйдар і ротар. За дзень было выкарыстана паўтары тоны паліва.

Усё робіцца для таго, каб снегавая каша не замаруджвала рух, але ж і вадзіцелям неабходна таксама адказна ставіцца да паводзін за рулём. Дарожнікі расказваюць, што асобныя аўтааматары ў час язды глядзяць фільмы на планшэце ці вядуць размовы па тэлефоне, пры гэтым у полі ўвагі знаходзіцца не столькі дарога, колькі гаджаты. А потым вінавацяць у дарожна-транспартных здарэннях дарожных рабочых, вадзіцеляў сустрэчных машын, але толькі не сябе.

Актыўна ідзе ўборка снегу і на чыгунцы. Спецыяльны транспарт рэгулярна расчышчае пуці. А на вакзале снег не толькі ўбіраюць з рэек і пасадачных платформ, але і звозяць, каб не замінаў руху па пероне.