Добраўпарадкаванне

Вярніся, лясны алень!

Летась наш горад набыў шмат цікавых кампазіцый і малых архітэктурных форм, дзякуючы якім стаў больш прывабным для прагулак і экскурсій. Адным з улюблёных месцаў адпачынку асіпаўчан стала “ўзбярэжжа” сажалкі ў гарадскім парку, якое таксама было добраўпарадкавана мінулым летам. Праведзена азеляненне, паабапал размешчаны лавачкі, нават казачная залатая рыбка нібы спецыяльна выскачыла з вадаёма, каб выконваць жаданні прахожых.

З’явілася тут і вясёлая сямейка аленяў. Але, на жаль, нядоўга радавала гараджан. Аматары сэлфі сталі літаральна атакаваць жывёл. Фатаграфаліся побач з імі, забіраліся вярхом (!), вытапталі ўсю траву навокал. А потым і наогул хтосьці знішчыў дзве з трох аб’ёмных фігур.

І цяпер горды звер адзінока стаіць на зруйнаванай пляцоўцы, у скрусе пазіраючы на горад, і нібы ўшчувае: “У нас у лесе жывуць па іншых законах!”