“Заміж персідскага ўзора цвяток радзімы васілька…” Гэтыя словы славутага класіка ўзгадваюцца, калі праходзіш міма дома 36 па цэнтральнай вуліцы горада. Чаму менавіта яны? Таму што ў канцы мінулага месяца на тарцы пяціпавярхоўкі “расцвіла” ўспетая Багдановічам і Шагалам кветка.

І наогул знешні выгляд многіх дамоў сёлета мяняецца ў лепшы бок. Прыемна, што ў аздабленні фасадаў з’яўляюцца элементы нацыянальнай прыналежнасці. На 9-павярховым доме па вуліцы Юбілейнай, напрыклад, гэта фрагмент беларускага арнамента.

У вытворча-тэхнічным аддзеле УКП ЖКГ, якое з’яўляецца генеральным падрадчыкам маштабнага абнаўлення, расказалі, што сёлета запланавана адрамантаваць 49 дамоў. У залежнасці ад стану пабудовы і месца яе знаходжання праводзяцца розныя работы. Тынкуюцца і афарбоўваюцца фасады, робіцца адмостка, рамантуюцца ўваходныя групы, праводзіцца абшыўка экранаў балконаў. На панэльных дамах герметызуюць стыкі. Надзяляецца ўвага і малюнкам.

Работы ідуць і будуць працягвацца да канца года. Абнаўленне асобных жылых дамоў прой-дзе на вуліцах Сумчанкі, Дзяржынскага, Каралёва, Сташкевіча, Дзмітрыева, Крыловіча, 60 гадоў Кастрычніка, Сацыялістычнай, Ленінскай, Каданчыка, Кастрычніцкай, Завадской, Абросімава і іншых.

Абнаўленнем будынкаў займаюцца работнікі мясцовага камунальнага прадпрыемства. А вось мастацкі роспіс робяць сумесна з падраднымі арганізацыямі, якіх выбіраюць на конкурснай аснове.

Зараз не рэкамендуецца наведваць шматлюдныя месцы, а вось па вуліцах роднага горада гуляць не забаронена. І вельмі прыемна назіраць за тым, як разам з вішнямі, слівамі ды грушамі яркі ўбор надзяваюць і дамы, у якіх мы жывём або міма якіх ходзім. А гэта чарговая нагода для няспешных і ўдумлівых прагулак на свежым паветры і атрымання станоўчых уражанняў.

Іна Заскевіч.

i.zaskevich@gzt-akray.by