“Калі наваколле не цешыць снегам, няхай радуе чысцінёю,” — такая думка была ў многіх землякоў падчас правядзення раённага суботніка 19 снежня.

Асноўнымі аб’ектамі добраўпарадкавання ў гэты не па-зімоваму цёплы дзень сталі лясныя масівы. Напрыклад, работнікі райвыканкама прыбіралі тэрыторыю ад інтэрната вагонабудаўнічага завода да пасёлка Савецкі, вуліцу Камуністычную, лес ля помніка на брацкай магіле савецкіх воінаў, партызан і ахвяр фашызму па вуліцы Сумчанкі і інш. Актыўна ўдзельнічалі ў мерапрыемстве многія прадпрыемствы і арганізацыі. Так, у ДДЛГУ “Асіповіцкі вопытны лясгас” на работу выйшла 174 чалавекі, імі прыбрана 26 гектараў лесу абапал дарог, сабрана больш за паўсотні кубаметраў смецця, валежніку.

Не засталося пасіўным і вясковае насельніцтва. Напрыклад, у Вяззеўскім сельсавеце ўбралі звалкі ў в. Смык, пачысцілі бераг вадасховішча.

Парадак наведзены, можна прыступаць да ўпрыгожвання ёлак. Усім — добрага пераднавагодняга настрою!