Раней і зараз

Чарняхоўка і яе наваколле

У 2011 годзе тэрыторыя мікрараёна вуліцы Чарняхоўскага знаходзілася ў стане, які дазваляў карыстацца ёй у інтарэсах умацавання нацыянальнай абароны. Гэты кавалак гарадской зямлі ляжыць побач з ангарамі 336 рэактыўнай артылерыйскай брыгады, і арганізаваць выезд пускавых установак «Смерч» для непрацяглых палявых заняткаў сюды значна прасцей, чым на палігон «Асіповіцкі». Да таго ж эканомія мотарэсурсу: у той перыяд яго вайскоўцы імкнуліся расходаваць мінімальна, бо запчастак не хапала, і тэхніка, што засталася яшчэ ад Савецкай арміі, патрабавала вялікай увагі да свайго стану.

Сёння дыслакаваныя ў Асіповічах РСЗА “Смерч” дагледжаны так дыхтоўна, што нібы ўчора сышлі з канвеера. Толькі яны ўжо не галоўная сіла беларускай рэактыўнай артылерыі. Гэты пачэсны тытул мае РСЗА “Паланез” .

А “Чарняхоўка” — самы перспектыўны раён гарадской забудовы. За мінулае дзесяцігоддзе яна змянілася непазнавальна, і перамены яшчэ не скончаны. Тут будуецца жыллё, даводзяцца да неабходных эксплуатацыйных кандыцый праезныя часткі вуліц, развіваецца інфраструктура.

Дарэчы, аб апошняй. Калі працягнуць панараму ўправа — убачым ФАК “Жамчужына”, а азірнуўшыся назад — вуліцу Юбілейную і размешчаную на ёй аўтазаправачную станцыю. Хто з чытачоў памятае, у якім годзе быў пабудаваны першы, пашырана другая і мадэрнізавана трэцяя?

Дакладныя даты называць не будзем, іх знайсці нескладана самастойна, калі пашукаць у зададзеным прамежку часу — 2011-2020 гады. Падвох жа пытання ў іншым: чалавек настолькі хутка прывыкае да добрага, што ўпэўнены: так было заўсёды.