Нібы ледакол, рухаецца па неабсяжным снежным прасторы трактар МТЗ-320, расчышчаючы шляхі зносін для пешаходаў. Спыніўшы машыну, Аляксандр Скала расказвае аб сваёй рабоце:

— Скончыўшы асіповіцкі ліцэй № 8, як раней называўся цяперашні каледж, прыступіў да работы. У УКП ЖКГ вакансій тады не было, таму гады два працаваў у прыватнага прадпрымальніка ў Верайцах. І толькі пасля гэтага стаў работнікам камунальнага прадпрыемства.

Аляксандр з дзяцінства паважаў тэхніку. Ахвотна катаўся на трактары ў Ясені з дзядулем Віктарам Данілавічам, з цікаўнасцю назіраў за яго работай. Таму ўпраўляць гэтай універсальнай машынай навучыўся рана.

Сёння стаж яго работы трактарыстам ужо больш за 12 гадоў. Асвоіў розныя аперацыі. А летась, пасля таго як атрымаў новы трактар, іх спектр яшчэ больш пашырыўся. Кампактныя памеры трактара дазваляюць яму манеўраваць на вузкіх тратуарах, не пашкаджаючы пакрыцця, паміж дрэў, на подступах да помнікаў. І ў час моцных мяцеліц Аляксандр чысціў, грузіў, адвозіў снег, пасыпаў тратуары — словам, ствараў умовы для зручнасці землякоў.

Вясной профіль яго работ зменіцца: падмятаць праезную частку, касіць траву, удзельнічаць ва ўборцы смецця — работы не пачаты край!

У залежнасці ад надвор’я і віду работ нярэдка выязджаць з дому даводзіцца і ў 4-5 гадзін раніцы. Калі стыхія прарэдзіла гарадскі парк, працаваў ад золку да змяр­кання. Але Аляксандр разумее, што гэта вытворчая неабходнасць, і ва ўказаны час паспяшае ў рэйс, каб рабіць жыццё землякоў больш камфортным.

Кацярына Іванова