Ці дбаюць землякі пра знешні выгляд горада? Адказ на гэта пытанне шукалі на вуліцах райцэнтра.

Добраўпарадкаваннем горада займаецца УКП ЖКГ. Сёлета работнікамі прадпрыемства на асіповіцкіх вуліцах выса-джана 740 бегоній, 300 сальвій, 150 петуній, 200 каліў тагеціса, 40 — колеуса.

Уборшчыкам тэрыторыі ў гэтым годзе дапамагаюць вучні СШ № 4 Аліна Кароль, Марыя і Максім Турляк. Усе разам яны праполваюць клумбы, паліваюць кветкі. Зялёнае ўбранства горада папоўнілі дзве сотні туй і 50 ліп.

Камунальнікі даглядаюць замацаваныя за імі тэрыторыі, а газоны і клумбы, размешчаныя абапал прадпрыемстваў і ўстаноў, павінны даглядаць работнікі адпаведых арганізацый. Кіраўніцтва большасці з іх адказна ставіцца да добраўпарадкавання прылеглай тэрыторыі. Але, на жаль, ёсць і тыя, хто перакідвае з хворай галавы на здаровую: няхай замест мяне прыбірае хтосьці іншы. За прыкладам далёка хадзіць не трэба.

У № 43 газеты “Асіповіцкі край” ад 7 чэрвеня быў надрукаваны крытычны матэрыял, у якім адзначалася, што каля магазіна “Марка”, здадзенага ў арэнду ААТ “Гандаль”, у самым цэнтры горада на клумбе ўжо не відаць дэкаратыўных раслін з-за пустазелля, якое вырасла ў пояс.

Ад дырэктара ААТ “Гандаль” Анатолія Кулагі быў атрыманы адказ:

“Дадзены запыт накіраваны не па адрасе. Клумба, якая знаходзіцца каля магазіна № 24, вул. Сумчанкі, 27, з’яўляецца гарадской тэрыторыяй”. Незразумела, што меў на ўвазе кіраўнік, але ў рашэнні райвыканкама № 22-26 ад 27 мая 2022 г. сказана: “Далучыць юрыдычных асоб і індывідуальных прадпрымальнікаў да выканання работ па падтрыманні належнага санітарнага стану на тэрыторыях зямель агульнага карыстання горада Асіповічы і населеных пунктаў Асіповіцкага раёна, у тым ліку на прылеглых да прадастаўленых ім зямельных участкаў тэрыторыях уласнымі намаганнямі і за кошт уласных сродкаў.” У пераліку юрыдычных асоб, індывідуальных прадпрымальнікаў, на якіх распаўсюджваецца дадзены дакумент, за № 23 значыцца і ААТ “Гандаль”.

Дырэктар ТАА “Марка-Сэрвіс” С.А. Паус у сваю чаргу таксама растлумачыў сітуацыю: “Памяшканне магазіна “Марка” па вул. Сумчанкі, 27 у г. Асіповічы выкарыстоўваецца на праве арэнды. У адпаведнасці з дасягнутым пагадненнем абавязкі па пакосе расліннасці ўскладзены на ўласніка памяшкання, у сувязі з чым ААТ “Марка-Сэрвіс” не нясе адказнасці за дадзеную сітуацыю. Адначасова лічым неабходным адзначыць, што ўласнікам ужо прыняты меры і 10.06.2022 г. тэрыторыя прыведзена ў належны санітарны стан”.

Праўда, належны санітарны стан гандлёвыя прадпрыемствы ўяўляюць даволі дзіўна: пустазелле разам з кветкамі было… скошана. Такім жа чынам уласнік паступіў у той жа дзень і з клумбай каля яшчэ аднаго свайго гандлёвага аб’екта: магазіна “Капеечка” на вуліцы Сумчанкі. Адным махам! Цяпер, відаць, будуць чакаць, калі атава вырасце. Такім чынам, клумбы паступова ператворацца ў палеткі. А вось да магазіна “Дуэт” не дайшоў той гора-касец, бо на клумбах, што ўпрыгожваюць (ці ўпрыгожваюць?) уваход, дзецям ужо ў хованкі можна гуляць.

Ці набудуць прывабны выгляд клумбы каля аб’ектаў ААТ “Гандаль”? Пытанне пакуль застаецца без канкрэтнага адказу.