Будаўніцтва

Што, дзе і наколькі прыгожа

Будаўніцтва сёлета ў рэгіёне не асабліва маштабнае. І тым не менш, па словах намесніка старшыні райвыканкама Аляксандра Ганчарова, новы мікрараён на вуліцы Чарняхоўскага застаецца месцам найбольшай будаўнічай актыўнасці. У гэтым годзе тут ужо здадзены ў экс-плуатацыю два шматпавярховыя домы — на 108 і 76 кватэр, завяршаецца добраўпарадкаванне вуліцы Міхалкіна — адной з чатырох транспартных артэрый, якія злучаюць жылую зону мікрараёна з транспартнай сістэмай горада. У бліжэйшых планах пачатак узвядзення яшчэ аднаго дома — на 84 кватэры. Зараз вядуцца тэндарныя таргі.

…Тут узнікае некаторая вытворчая інтрыга. Будынак па праекце цагляны, у той час як свайго роду стандартам матэрыялу жыллёвага будаўніцтва ў горадзе ўжо даўно сталі жалезабетонныя панэлі, якія выпускае Бабруйскі камбінат панэльнага домабудавання. Не дзіўна, што менавіта КПД і пабудаваў пераважную большасць гарадскіх шматпавярховак. Зацікавіцца КПД работай з няпрофільным будматэрыялам ці справай зоймецца хтосьці іншы — гэта адно пытанне. Але ёсць другое, куды больш агульнае. Будаўніцтва стала на паўзу не толькі на Асіповіччыне, таму за падрады ідзе вельмі жорсткая канкурэнцыя. Будзем спадзявацца, што ў гэтай барацьбе пераможа самы адказны і ўмелы.

Аднак пабудаваць — гэта яшчэ не ўсё. Здадзеныя ў эксплуатацыю аб’екты неабходна трымаць у адпаведным тэхнічным і прывабным вонкавым выглядзе. З нерухомасцю, якая знаходзіцца ва ўласнасці канкрэтных фізічных альбо юрыдычных асоб, усё проста. А вось з камунальнай маёмасцю — не заўсёды.

Сярод прыкладаў таго “як не трэба” Аляксандр Ганчароў узгадвае вадаём у гарадскім парку, які пэўны час таму стаў чымсьці вабіць рыбакоў. Важкасць улову тут сумніўная: вадаём выключна дэкаратыўны, флора з фаўнай у ім адчуваюць сябе не лепшым чынам. Ды і рыбалоўства тут забаронена афіцыйна — таксама з пазіцый падтрымання рэкрэацыйнага патэнцыялу паркавай зоны. Тым не менш, з аматарамі гарад-ской рыбалкі давялося праводзіць дадатковую тлумачальную работу. Прынамсі, асноўнай яе прычынай было не сядзенне з вудай каля папераджальнай таблічкі “Рыбалка забаронена”, а канкрэтныя факты пакідання смецця ў прыбярэжнай зоне.

* * *

Усе жадаюць, каб наш горад быў прыгожы і зручны. Для гэтага зроблена нямала, аднак без удзелу саміх асіпаўчан поспех будзе меншы, чым магчыма. А справа простая: адносіцца да таго, чым мы ўсе карыстаемся, з павагай і паслядоўна выконваць тры элементарныя правілы: не псаваць, не засмечваць і не даваць рабіць шкоду камунальнай маёмасці несвядомым удзельнікам мясцовай супольнасці.