Суботнік

Чысцей, прыгажэй і з душою

План работ на гэты дзень быў вызначаны штабам загадзя. Ён прадугледжваў у першую чаргу добраўпарадкаванне і прывядзенне ў належны стан замацаваных за арганізацыямі і прадпрыемствамі тэрыторый, мемарыяльных комплексаў, месцаў баявой і воінскай славы, населеных пунктаў, лесапаркавых зон, аб’ектаў інфраструктуры. Зразумела, спраў па добраўпарадкаванні восеньскай парою заўсёды хапае, і не толькі на ўласных падворках. Сапраўднаму гаспадару заўсёды хочацца, каб яшчэ да наступлення маразоў усё было падрыхтавана і зроблена належным чынам.

Карэспандэнты “АК”, папярэдне навёўшы парадак каля рэдакцыі, накіраваліся ў рэйд па горадзе, каб потым расказаць землякам, як праходзіў суботнік. Не можам не адзначыць, што паўсюдна вяліся актыўныя работы і працавалі людзі з добрым настроем. Гэта значыць, што ў кожнага было жаданне зрабіць нашу малую радзіму больш прыгожай і чыстай.

Зразумела, цікавіліся журналісты і меркаваннямі ўдзельнікаў.

Таццяна Пахоменка,

начальнік аддзела ідэалагічнай работы і па справах моладзі райвыканкама:

— Суботнік заўсёды быў важнай справай у навядзенні парадку. А ў Год народнага адзінства, на маю думку, гэта мерапрыемства набывае асаблівы акцэнт. Разам — яно заўсёды лепш. Напрыклад, дэпутаты райсавета, працаўнікі ад- дзела ідэалагічнай работы  і па справах моладзі райвыканкама, прадстаўнікі грамадскіх аб’яднанняў  высадзілі “Алею адзінства” ў мікрараёне Чарняхоўскага. Месца было абрана дэпутатамі невыпадкова: гэта частка горада дынамічна развіваецца, тут будуюцца новыя дамы, жыве шмат маладых сем’яў з дзецьмі. Мяркую, тыя 130 клёнікаў, якія “прапісаліся” ў новым наваколлі, стануць сапраўдным доўгатэрміновым   упрыгажэннем перспектыўнага мікрараёна.

Дарэчы, калі матэрыял рыхтаваўся да друку, у рэдакцыю патэлефанавала асіпаўчанка, каб падзякаваць кіраўніцтву раёна за пасаджаную алею і энтузіязм, з якім гэта справа выконвалася.

Анатоль Галоўчыц, жыхар райцэнтра:

— Свайго роду суботнік праводжу каля сядзібы кожныя выхадныя, аднак сёння працую з асаблівым імпэтам, бо бачу, што работы вядуцца па ўсіх Асіповічах. Калі кожны будзе старацца падтрымліваць чысціню там, дзе жыве, то і ўвесь горад стане акуратным і дагледжаным. Лічу, што калі ў чысціні сядзіба, то і ўтульна ў доме і на душы.

Аркадзій Новікаў,

намеснік дырэктара па ідэалагічнай рабоце ДДЛГУ “Асіповіцкі доследны лясгас”:

— Наша прадпрыемства ўдзельнічала ў суботніку шматпланава. Па-першае, мы забяспечылі саджанцамі клёнаў і бяроз іншыя працоўныя групы; па-другое, самі былі заняты на пасадцы сасны на адной з пустак на паўднёвым баку райцэнтра. Плошча тут склала больш за гектар. Спадзяюся, саджанцы прыжывуцца і праз некаторы час на гэтым месцы  будзе ладны сасняк. Канечне, працавалі толькі з пазітыўнымі думкамі — а як інакш? Шчыра кажучы, прыемна было далучыцца да азелянення райцэнтра. Зялёныя зоны — гэта заўсёды лепш і больш карысна для акаляючага асяроддзя і людзей, чым проста пусты кавалак зямлі.

Актыўна вялося добраўпарадкаванне ў гэты дзень і ў сельскіх населеных пунктах. Напрыклад, на Дараганаўшчыне прыбралі 10 месцаў воінскіх пахаванняў, было згрэблена нямала лістоты, а  таксама ў самім Дараганаве паміж чыгункай і школай з’явілася свая “Алея адзінства” з 25 клёнікаў і такой жа колькасці рабінак. Асноўнай справай на тэрыторыі Лапіцкага сельсавета стала ўборка берагавой лініі ракі Свіслач у аграгарадку Лапічы ў двух месцах — побліз могілак і каля вуліцы Армейскай. А ўдзельнічалі ў экалагічнай ініцыятыве не толькі дарослыя, але і школьнікі.