Армія

Навагодні падарунак вайскоўцам

Нядаўна ў Паўднёвым ваенным гарадку адбылося ўрачыстае адкрыццё капітальна адрамантаванай спартыўнай залы, якой будзе карыстацца асабовы састаў часцей Асіповіцкага гарнізона.

Цырымонія прайшла ў прысутнасці міністра абароны краіны Віктара Хрэніна, старшыні Праўлення ААТ “Банк развіцця Рэспублікі Беларусь” Андрэя Жышкевіча, беларускага пасла ў Рэспубліцы Азербайджан Андрэя Раўкова, генерал-лейтэнанта запасу Юрыя Жадобіна, начальніка ракетных войск і артылерыі Узброеных Сіл Генадзя Казлоўскага і іншых афіцыйных асоб.

У сваім выступленні міністр абароны адзначыў, што фізічная падрыхтоўка — адзін з асноўных элементаў прафесійна-пасадавага навучання і выхавання ваеннаслужачых, таму апошнім часам на ўмацаванне адпаведнай матэрыяльнай базы звяртаецца вялікая ўвага. Толькі за 2020 год уведзена ў эксплуатацыю звыш 500 падобных  аб’ектаў, і работа ў гэтым кірунку будзе працягвацца.

“Уласнікам” сучаснай спартыўнай залы, дзе адначасова можа займацца да 50 чалавек, стала 465 ракетная брыгада. Камандзір часці Андрэй Емяльянаў з гэтай нагоды выказаў упэўненасць, што асіповіцкія артылерысты і ракетчыкі ўжо ў хуткім часе здолеюць дасягнуць значных вынікаў як непасрэдна ў індывідуальнай фізпадрыхтоўцы, так і ва ўдзеле ў арганізацыі збораў і спаборніцтваў на першынство абароннага ведамства.