У Лапічах адкрылі мемарыяльны знак 345 пдп
Гонар лапіцкіх дэсантнікаў
Малавядомая падзея вайсковай гісторыі Асіповіччыны: 30 снежня 1944 года ў мястэчку Лапічы быў сфарміраваны 345 стралковы полк, які праз два гады пераўтварыўся ў паветрана-дэсантны і атрымаў ганаровае званне “Гвардзейскі”.
Лапіцкім стралкам не давялося ўдзельнічаць у значных бітвах з нацыстамі, аднак іх нашчадкам-дэсантнікам было наканавана правесці ў баях амаль 15 гадоў: вайна ў Афганістане, узброеныя канфлікты ў Грузіі, Паўночнай Абхазіі…
Нядзіўна, што, нават пасля расфарміравання часці ў 1998 годзе, яе ветэраны цвёрда трымаюцца традыцый баявога братэрства. Адна з іх — штогадовыя сустрэчы ў гонар дня нараджэння палка. Звычайна яны адбываюцца ў Маскве ці Мінску, аднак сёлета — з нагоды юбілею — дэсантнікі вырашылі сустрэцца ў Лапічах і ўсталяваць тут памятную дошку.
Ініцыятыва была падтрымана кіраўніцтвам раёна, і 21 снежня з удзелам старшыні райсавета дэпутатаў Сяргея Сувеева, намесніка старшыні райвыканкама Ганны Землянухінай, старшыні райарганізацыі воінаў-інтэрнацыяналістаў Юрыя Корбана і ў прысутнасці прадстаўнікоў мясцовай грамадскай суполкі адбыўся ўрачысты мітынг, на якім і прайшло адкрыццё мемарыяльнага знака 345 гвардзейскаму парашутна-дэсантнаму Чырванасцяжнаму, ордэна Суворава палку імя 70-годдзя Ленінскага камсамола.
Прыемным сюрпрызам для былых дэсантнікаў стала паведамленне пра рашэнне міністра абароны Расійскай Федэрацыі Сяргея Шайгу аб вяртанні 345 пдп у састаў Узброеных Сіл нашага стратэгічнага саюзніка. Па папярэдніх прагнозах, “рэінкарнацыя” часці можа быць прымеркавана да яе 80-годдзя.
Што тычыцца далейшага лёсу памятнага знака ў Лапічах, то парашутысты маюць намер стварыць побач з ім інсталяцыю, сэнсавым цэнтрам якой павінна стаць баявая машына дэсанта.
Пастфактум: двое з асіповіцкіх воінаў-інтэрнацыяналістаў — Уладзімір Белы і Васіль Койпіш — таксама служылі ў 345 парашутна-дэсантным палку. Пра баявую біяграфію першага можна прачытаць у матэрыяле «В Хосте и Панджшере» (гл. «АК» № 89 ад 15.11.2019 г.).
