Ганаровая задача з “зорачкай”

Баявая тэхніка мясцовых артылерыстаў і ракетчыкаў выкарыстоўваецца не толькі па прамым прызначэнні. Ёсць у яе і яшчэ адзін — ганаровы — абавязак. Жыхары і госці Асіповіччыны не аднойчы бачылі машыны брыгад гарнізона на раённых святах, мясцовых парадах да Дня Перамогі або Дня Незалежнасці. Традыцыйна ўдзельнічаюць асіповіцкія ваенныя і ў святочных рэспубліканскіх парадах войскаў: каму, як не ім, дэманстраваць магутнасць беларускіх ракетчыкаў і артылерыстаў?

Не стаў выключэннем і не зусім просты 2020 год. Яшчэ ў сярэдзіне лютага прадстаўнікі 336 рэактыўнай артылерыйскай брыгады накіраваліся ў сталіцу: рыхтавацца да майскага выступлення ў гонар 75-годдзя Вялікай Перамогі. Часовым пунктам дыслакацыі асіповіцкіх рэактыўшчыкаў пад кіраўніцтвам камандзіра 77 асобнага рэактыўнага дывізіёна 336 рэабр падпалкоўніка Андрэя Чарняцова стаў 56 асобны полк сувязі, што знаходзіцца ў сталічным Уруччы.

— Гэта ганаровая задача для ўсіх, але асабліва для ваеннаслужачых тэрміновай службы: за год–паўтара ў арміі паспець паўдзельнічаць у такім маштабным парадзе — сапраўды запамінальна, — адзначае падпалкоўнік Чарняцоў. — Усяго сабралася чатыры дзясяткі салдат, сяржантаў, прапаршчыкаў і афіцэраў, уключаючы экіпажы баявых машын і тых, хто займаўся тэхнічным абслугоўваннем і рамонтам.

Нашай задача было прадэманстраваць гонар сучаснай беларускай ваеннай прамысловасці — рэактыўную сістэму залпавага агню “Паланэз”. Усяго для ўдзелу ў святочных мерапрыемствах накіравалі 11 адзінак тэхнікі, 9 з якіх — менавіта знакамітая далёка за межамі Асіповіцкага раёна РСЗА.

Першыя тыдні ў Мінску рэактыўшчыкі займаліся выключна тэхнічным абслугоўваннем “Паланэзаў”: праводзілі дасканалую дыягностыку, ліквідавалі магчымыя дэфекты і “шурпатасці” ў працы складаных механізмаў. Адначасова рыхтавалі і да пафарбоўкі. Усё ж павінна быць на выдатна ў такі святочны дзень!

Наступны перыяд — трэніроўкі ў руху, бо яшчэ невядома, што складаней: выканаць на цяжкай баявой машыне вучэбную задачу з перасоўваннямі па палігоне або прыгожа “прадэфіліраваць” у калоне па сталічным праспекце перад немалой колькасцю самых розных гледачоў. Тройчы на тыдзень рэактыўшчыкі выязджалі на аэрадром “Ліпкі” пад Мінскам, дзе быў дакладна змадэляваны маршрут і паслядоўнасць руху тэхнікі. Генеральная рэпетыцыя адбылася літаральна напярэдадні свята — 8 мая — ужо ў горадзе. Дарэчы, да таго, як пандэмія “адмяніла” ўсялякі культурны адпачынак, асіповіцкія “тэрміноўнікі” паспелі яшчэ наведаць некаторыя музеі ў вольны час.

— Я ўдзельнічаў у парадзе ўжо ў пяты раз, але як старшы параднай каробкі — упершыню, — расказвае Андрэй Чарняцоў. — Ведаеце, складана ў любым выпадку: мы павінны выканаць усё ідэальна. Але на гэты раз яшчэ і адказнасць значна вышэйшая: трэба не толькі самому адпавядаць усім высокім па-трабаванням, а яшчэ і падначаленых настроіць патрэбным чынам.

Натуральна, для ўдзелу ў рэспубліканскім парадзе да Дня Перамогі адбіралі лепшых. Цікава, што сярод 13 ваеннаслужачых тэрміновай службы дзесьці палова — ужо вопытныя ў гэтым пытанні: выступалі на мінулагоднім парадзе ў Дзень Незалежнасці краіны. Таму асаблівых пытанняў не ўзнікала: усё па графіку і ў тэрмін.

І падчас падрыхтоўкі, і непасрэдна на парадзе ўсе мелі сапраўдны баявы настрой. Дзяржаўная задача пастаўлена — трэба выконваць як мага лепш. Спадзяюся, мы справіліся. А беларусы, госці краіны і інтэрнэт–гледачы з усяго свету зразумелі, што і сёння наш ваенпрам не стаіць на месцы.

Марыя ТАЛЕЙКА.

m.taleiko@gzt-akray.by