Урачыста і запамінальна

Прызыўная кампанія гэтай вясной праходзіла ва ўмовах строгіх эпідэміялагічных забарон. Нетрадыцыйнай аказалася і “канчатковая кропка” — цырымонія прыняцця ваеннай прысягі папаўненнем.

Калі звычайна ў ваенным гарадку “Паўднёвы” ў Асіповічах двойчы на год бывае шматлюдна — тут адразу тры воінскія часці, — то на гэты раз цырымонія прайшла выключна для саміх навабранцаў. Матывы ўсім зразумелыя, таму асаблівых нараканняў у бацькоў гэта не выклікала. Праўда, некаторыя ўсё ж прыехалі да КПП, але на тэрыторыю гарадка не трапілі: не да-зволена. Каб кампенсаваць родным і сябрам адсутнасць у такі адказны момант каля плаца, ваеннаслужачыя арганізавалі анлайн-трансляцыі ў сацсетках і здымалі відэа, якое потым можна пераглядаць.

Цырымонія прыняцця прысягі прайшла як звычайна — святочна і запамінальна для навічкоў   51 гвардзейскай артылерыйскай, 336 рэактыўнай артылерыйскай і 465 ракетнай брыгад. Далучыліся да яе і ганаровыя госці, у тым ліку начальнік штаба ракетных войск і артылерыі Узброеных Сіл краіны палкоўнік Міхаіл Чыгілейчык. З прамовамі да навабранцаў звярнуліся першы намеснік старшыні райвыканкама Сяргей Ананіч, старшыня райарганізацыі воінаў-інтэрнацыяналістаў маёр у адстаўцы Юрый Корбан і ветэран 51 артдывізіі палкоўнік у адстаўцы Васіль Віктароўскі. На ратную службу байцоў блаславіў настаяцель Крыжа-Узвіжанскага храма протаіерэй Аляксандр Кісялёў. Завяршылася ж цырымонія ўрачыстым маршам пад сцягамі ўсіх трох брыгад.