Зараз у ваенных часцях беларускіх Узброеных Сіл ідзе чарговая комплексная трэніроўка па баявой гатоўнасці. Гэты ўвогуле стандартны элемент праверкі эфектыўнасці сістэмы ваеннага кіравання для некаторых ваенных камісарыятаў Магілёўскай вобласці мае асаблівае значэнне.

З 31 жніўня шэраг РВК будзе аб’яднаны, у выніку чаго агульная іх колькасць скароціцца на 8 адзінак. Узгаданая трэніроўка дае магчымасць папярэдне выпрацаваць найбольш дзейсныя формы і метады работы ў новых умовах.

Найбольш складаным будзе тэрытарыяльнае пашырэнне двух ваенкаматаў. Першы аб’яднае існуючыя зараз ваенкаматы Бабруйска, Бабруйскага, Глускага і Кіраўскага раёнаў, другі — ваенкаматы Асіповіцкага і Клічаўскага раёнаў. У абодвух выпадках асноўныя праблемы, якія трэба тэрмінова вырашыць, звязаны са складанасцю размежавання паўнамоцтваў паміж галаўным ваенкаматам і яго абасобленымі групамі, арганізацыяй дакументаабароту, забеспячэннем надзейнасці і сістэм электроннай сувязі і г.д.

Прычым, калі ў першым выпадку задача стаіць так бы мовіць якасная, то ў другім — колькасная. Адлегласць паміж Асіповічамі і Клічавам каля 80 кіламетраў — калі дабірацца аўтатранспартам, таму колькасць паездак супрацоўнікаў ваенкамата па службовых справах і грамадзян, якія звяртаюцца ў яго па нейкіх пытаннях, павінна быць зведзена да мінімуму.

Па словах ваеннага камісара Асіповіцкага РВК падпалкоўніка Мікалая Гомана, выкарыстаць ужо існуючыя напрацоўкі пры фарміраванні аб’яднаных ваенкаматаў практычна немагчыма: у кожным выпадку сітуацыя настолькі спецыфічная, што даводзіцца шукаць індывідуальныя падыходы. У пераходны перыяд новая і старая структуры працуюць паралельна, што дае магчымасць без змяншэння эфектыўнасці работы “разрульваць” магчымыя збоі, правяраць дзейснасць розных варыянтаў узаемадзеяння і кіравання ва ўсіх накірунках дзейнасці.

Зразумела, гэта не проста. Аднак у арміі цяжкасці існуюць для таго, каб іх пераадольваць. Прычым у вызначаныя адпаведнымі загадамі тэрміны.