У лютаўскім выпуску “Прысягі” паведамлялася аб адпраўцы групы ваеннаслужачых і баявой тэхнікі 336-й рэактыўнай артылерыйскай брыгады ў Мінск, дзе асіповіцкія ракетчыкі павінны рыхтавацца да параду, які пройдзе 9 Мая. Як жа ідзе гэтая падрыхтоўка?

Па словах падпалкоўніка Уладзіміра Пацоўскага, які ўзначальвае накіраванае ў сталіцу падраздзяленне-“каробку”, адразу пасля прыбыцця ў месца часовай дыслакацыі на пускавых устаноўках “Смерч” было праведзена пазачарговае тэх-абслугоўванне, падчас якога адбылася замена ўсіх спецвадкасцей. Аб’ём апошніх уражвае: у кожнай машыне каля 300 літраў маторнага, трансмісійнага і іншых відаў масла.

Два тыдні назад экіпажы баявых машын прыступілі да трэніровак. Яны ідуць па аўторках, серадах і чацвяргах на ваенным аэрадроме “Ліпкі”, дзе пабудаваны дакладны “макет” часткі горада, па якім запланавана перасоўванне тэхнікі падчас свята. Рэжым падрыхтоўкі вельмі напружаны: адпрацоўка элементаў сінхроннага руху цяжкай тэхнікі пачынаецца з 4 гадзін раніцы, а адбой у 22 гадзіны. Чаго хаваць: за дзень усе так стамляюцца, што засынаюць імгненна…

У тыя дні, калі трэніровак няма, “Смерчы” вяртаюцца ў ваенны гарадок 120-й асобнай механізаванай брыгады — зноў жа для тэхнічнага абслугоўвання. Павышаны кантроль за станам установак тлумачыцца складанымі ўмовамі эксплуатацыі: у сухое надвор’е рух мноства цяжкіх машын утварае над аэрадромам шчыльныя воблакі пылу, у якіх механізмы пускавых працуюць з павышаным расходам мотарэсурсу. Увага да “здароўя” пускавых установак мае плён: ніводная трэніроўка не была сарвана па тэхнічных прычынах.

Нельга казаць, што ўсё падчас заняткаў атрымліваецца выдатна, але ж часу на падрыхтоўку адведзена дастаткова, і сумнявацца ў паспяховасці асваення аднаго з найбольш складаных відаў ваджэння няма ні ў камандзіраў, ні ў іх падначаленых. Кожны выдатна разумее, што парад Перамогі — вельмі важнае для беларускай дзяржавы мерапрыемства.

Высокая матывацыя дае сілы кожнаму вытрымліваць напружаны тэмп трэніровак, і ўсё ж некаторыя з ваенна-служачых укладваюць у агульную справу больш, чым ад іх патрабуецца. Сярод гэтых сапраўдных мужчын і выдатных салдат трэба ўзгадаць старшага механіка каробкі маёра Андрэя Цвірко, начальніка разліку пускавой устаноўкі лейтэнанта Рамана Мішыева, старшага прапаршчыка Андрэя Ліпскага, намесніка начальніка разліку малодшага сяржанта Аляксандра Дзяцела. Між іншым, апошні — адзіны з асіпаўчан, ваенна-служачых тэрміновай службы 336-й рэабр, якому аказаны гонар стаць удзельнікам парада ў гонар 70-годдзя Вялікай Перамогі.

Дзмітрый САЎРЫЦКІ.