7 мая ў Магілёве адбылася цырымонія ўзнагароджвання работнікаў друкаваных і электронных сродкаў масавай інфармацыі, прымеркаваная да двух прафесійных журналісцкіх свят: Дня друку і Дня работнікаў радыё, тэлебачання і сувязі.

Па словах старшыні аблвыканкама Пятра Рудніка і кансультанта ўпраўлення друкаваных СМI і знешніх сувязей Міністэрства інфармацыі Рэспублікі Беларусь Анатоля Шычко, на Магілёўшчыне сёння працуе вельмі моцная ў прафесійным плане каманда журналістаў рэгіянальных выданняў, і іх калектыўны вопыт можа і павінен стаць асновай для развіцця сродкаў масавай інфармацыі для іншых абласцей.
Таксама дастойны пераймання вопыт друкаваных СМI Магілёўшчыны ў арганізацыі работы з чытацкай аўдыторыяй: па выніках I квартала рэгіён адзіны ў краіне здолеў утрымаць тыражы сваіх перыядычных выданняў.

Прыемна, што ў ліку лепшых майстроў сваёй справы былі названы і работнікі асіповіцкай “раёнкі”: загадчык аддзела эканомікі Дзмітрый Саўрыцкі заняў другое месца ў абласным творчым спаборніцтве сярод журналістаў дзяржаўных газет, а галоўны бухгалтар Алена Ерко ўшанавана Ганаровай граматай упраўлення ідэалагічнай работы Магілёўскага аблвыканкама за забеспячэнне высокай выніковасці фінансава-эканамічнай дзейнасці выдання.