У АСВК “Новы шлях” на ўчарашнюю раніцу ўбрана 408 гектараў збожжа з запланаваных 828. Працаўнікі палёў цалкам зжалі азімую пшаніцу на плошчы 100 гектараў, закончылі абмалочваць азімае трыцікале, якое займала такую ж тэрыторыю (атрымалі самы высокі паказчык у раёне 46,2 ц/га). Пакарылася камбайнерам і палова палёў, засеяных жытам — у засеках ужо знаходзіцца 557 тон. З 50 гектараў аўса абмалочана 38. Усяго ж на рахунку кааператыва 1.375 тон зерня новага ўраджаю. Сярэдняя ўраджайнасць — 33,7 цэнтнера на круг.

На нівах гаспадаркі шчыруе 3 экіпажы: Мікалай Гіліцкі і Мікалай Новік, Юрый Еўдакімовіч і Валерый Крышаніннікаў, Міхаіл Калячка і Яўгеній Панькоў (на здымку). Апошні тандэм на камбайне КЗС-1218 намалаціў з пачатку жніва больш за 700 тон збожжа. Міхаіл працуе ў калгасе камбайнерам ужо трэці сезон і ўвесь час займае лідзіруючыя пазіцыі. А вось у яго напарніка гэта першы вопыт работы на калгаснай ніве ў “Новым шляху”, але механізатары знайшлі ўзаемаразуменне і спраўляюцца з пастаўленай задачай на “выдатна” — трымаюць першынство сярод іншых камбайнераў раёна — удзельнікаў сёлетняга жніва.

— Да абавязкаў адносяцца адказна, уважліва сочаць за работай “стальнога каня”, не дапускаюць прастояў, — так пракаменціраваў кіраўнік прадпрыемства Віктар Строк зладжаную работу Калячкі і Панькова. — Спадзяёмся, што і надалей яны застануцца флагманамі ўборкі, і той баявы настрой, з якім яны садзяцца за штурвал камбайна, захаваецца да канца жніва.

Ніна ВІКТОРЧЫК. Фота аўтара.