Гэты тыдзень знамянальны тым, што па ўсёй краіне ідзе датэрміновае галасаванне на рэферэндуме.

Жыхары Асіповіччыны таксама актыўна ўдзельнічаюць у ім. Адным з першых Свіслацкі  ўчастак для галасавання № 24 наведаў настаяцель Нікольскага храма протаіерэй Андрэй Клепча. Прыйшоў не адзін, а ў суправаджэнні чатырохгадовага сына Васіля. Айцец Андрэй патлумачыў, што нядзеля — даволі напружаны для свяшчэннаслужыцеляў дзень, а таму вельмі зручна прагаласаваць датэрмінова. І, атрымаўшы магчымасць гэта зрабіць, ахвотна ёй скарыстаўся.

Што такое рэферэндум, старэйшыя дзеці шматдзетнай сям’і Клепчаў ведаюць: тлумачаць настаўнікі ў школе, ды і бацькі знаёмяць з усім, што адбываецца наўкола. А Васіля з меншымі знаёмства з жыццём у грамадстве яшчэ чакае. Сёння для іх грамадства — гэта сям’я. Дарэчы, Андрэй Клепча вельмі задаволены тым, што змяненні і дапаўненні Асноўнага закона краіны немалую ролю адводзяць гэтай найважнейшай ячэйцы грамадства, як і жыццю па духоўна-маральных законах.