З улікам кожнай дробязі
Для ДЭУ № 73 гэты год складваецца ў цэлым удала: па выніках 9 месяцаў выканана работ на суму 4,5 мільёна рублёў, што пры сярэдняй рэнтабельнасці 6,3 працэнта дазваляе глядзець у будучыню ўпэўнена. Ужо зразумела, што для дасягнення пастаўленай мэты — атрымаць гадавую выручку ў аб’ёме 5,25 мільёна рублёў — не спатрэбяцца надзвычайныя намаганні.
Зроблена насамрэч нямала, прычым толькі чвэрць з узгаданага вышэй даходу дало выкананне работ па прамых дагаворах. Усё астатняе — дарогі. Праведзены бягучы рамонт амаль 4,5 кіламетра шашы М5, з дапамогай устаноўкі “Слары Сіл” адноўлены эксплуатацыйныя якасці каля 8 кіламетраў — у сукупнасці, па ўсіх шляхах зносін, якія абслугоўвае дарожна-эксплуатацыйнае ўпраўленне.
Праведзены нядаўна экспертамі РУП “Белдарцэнтр” агляд вынікаў работы дарожных службаў ніякіх хібаў у дзейнасці ДЭУ № 73 не выявіў.
Аднак расслабляцца нашым дарожнікам няма магчымасці. Акрамя завяршэння прадугле-джаных планам рамонтных работ, яны ўдзяляюць шмат увагі падтрыманню абочын у належным стане. І калі абкошванне расліннасці можна весці з пэўнай рэгулярнасцю, то смецце, якое пакідаюць несвядомыя ўдзельнікі руху, трэба прыбіраць пастаянна.
Мяркуючы па тым, што асіповіцкі ўчастак магістралі Мінск-Гомель на фоне іншага кіламетражу выдзяляецца асаблівай акуратнасцю, з гэтай задачай калектыў дарожна-эксплуатацыйнага ўпраўлення спраўляецца паспяхова.
