Зладжаны калектыў — выніковая праца

Па выніках мінулага года выдатным прыкладам якаснай арганізацыі ідэалагічнай, інфармацыйна-прапагандысцкай і выхаваўчай работы прызнана дзейнасць калектыву цэнтра банкаўскіх паслуг № 722 ААТ “ААБ Беларусбанк”.

— Безумоўна, ідэалогія адыгрывае асаблівую ролю ў якасным фарміраванні адносін у працоўным калектыве, — адзначае намеснік дырэктара Вольга Карчэўская. — Яна не толькі спрыяе стварэнню выдатнага мікраклімату ў арганізацыі, але і ўплывае на развіцце канкурэнтаздольнасці, вырашэнне пастаўленых задач, якасць прадастаўляемых паслуг.

— Па якіх прынцыпах арганізуецца ідэалагічная работа ў банку?

— Па-першае, у нас створаны і працуе каардынацыйны савет. Уваходзяць у яго кіраўнікі падраздзяленняў і прадстаўнікі грамадскіх аб’яднанняў, а ўсе хвалюючыя моманты абмяркоўваюцца на пасяджэннях. Зразумела, маем перспектыўныя і аператыўныя планы на месяц, квартал, год. Абавязкова ўлічваюцца ў іх усе актуальныя падзеі як арганізацыі, так і рэгіёна, дзяржаўныя і прафесійныя святы.

Распрацавана сістэма кантролю за пытаннямі, якія ўзнікаюць у работнікаў банка. Іх сутнасць — папярэдзіць з’яўленне невыразнасцей, незадаволенасці ў калектыве шляхам пастаяннага кантакту, тлумачэнняў. Асаблі-вае месца адводзіцца дзейнасці інфармацыйна-прапагандысцкіх груп. Кожны месяц у банк завітваюць прадстаўнікі райвыканкама і мясцовых прадпрыемстваў і арганізацый, якія асвятляюць тэмы адзіных дзён інфармавання, а таксама адказваюць на пытанні работнікаў. Акрамя таго, асобна расказваем і пра жыццё банкаўскай структуры, каб калектыў заўсёды быў у курсе падзей.

— З чаго складаецца так званы сацпакет работнікаў ЦБП № 722?

— У ААТ “ААБ Беларусбанк” распрацавана праграма сацыяльнага і гуманітарна-культурнага развіцця. У яе межах, напры-клад, работнікам аказваецца матэрыяльная дапамога на будаўніцтва і набыццё жылля, прапануюцца пуцёўкі ў санаторыі, базы адпачынку, у тым ліку і для дзяцей. За кошт банка праводзяцца медыцынскія даследаванні, страхуюцца медрасходы. Арганізавана наведванне басейна, трэнажорнай залы, заняткаў па аквааэробіцы, пілатэсе, ёзе.

— А як наладжана супрацоўніцтва з грамадскімі аб’яднаннямі?

— Сёння ў нас створана 5 пярвічак: прафсаюзная і ветэранская арганізацыі, суполкі ГА “БРСМ”, “Белая Русь” і “ Беларускі саюз жанчын”. Натуральна, усе яны прымаюць актыўны ўдзел у арганізацыі ідэалагічнай работы ў банку, па іх ініцыятыве праходзіць шмат цікавых і карысных мера-прыемстваў. Так, пад эгідай “Белай Русі” для работнікаў ЦБП штогод праводзіцца масавае катанне на лядовай арэне ў Бабруйску. З дапамогай прафсаюза работнікі маюць магчымасць трапіць на культурна-відовішчныя мерапрыемствы, экскурсіі, спартыўныя спаборніцтвы. Прадстаўнікі БРСМ і саюза жанчын рэгулярна арганізуюць мерапрыемствы і акцыі для дарослых і дзяцей да Дня маці, Вялікадня, Новага года,  8 Сакавіка і 23 лютага, Дня ведаў. Ветэранскай арганізацыі гэтым летам спаўняецца 25 год — былыя работнікі банкаўскай сістэмы таксама без увагі ніколі не застаюцца.

— Чым яшчэ можна зацікавіць людзей не проста адпрацоўваць пэўную колькасць гадзін, а актыўна ўдзельнічаць у жыцці банка?

— Акрамя сумесных культурна-спартыўных мерапрыемстваў, у нашай сістэме праводзяцца  сур’ёзныя конкурсы прафесійнага майстэрства, падрыхтоўка да якіх значна аб’ядноўвае калектыў, а гэта, у сваю чаргу, і павышэнне кліенцкага сэрвісу, і рост яго эфектыўнасці. Тройчы наш ЦБП станавіўся лепшым у рознічным бізнесе, у ліку лідараў выступалі і аперацыйная служба, і аддзяленне банка ў Лапічах. Дарэчы, фота найбольш адказных і добрасумленных работнікаў размяшчаем на Дошцы гонару ЦБП.

Увогуле ж нам у ЦБП № 722 адзін з адным пашанцавала: усе прафесіянальныя, неабыякавыя, дзейсныя. А цікавасць калектыву да жыцця раёна, дзяржавы, грамадская актыўнасць, ініцыятыўнасць, жаданне плённа працаваць і развівацца — вось той вынік, дзеля якога і праводзіцца ідэалагічная работа. Безумоўна, недарэмна.