На чарговым пасяджэнні райвыканкама, якое прайшло пад началам старшыні Пятра Шукаловіча з удзелам кіраўніка справамі Магілёўскага аблвыканкама Рыгора Вароніна, было разгледжана больш за паўсотню разнастайных пытанняў, але прэваліравалі два: аб выніках работы галін народнай гаспадаркі і выкананні бюджэту раёна за I квартал.

Даклады па іх зрабілі адпаведна першы намеснік старшыні і начальнік фінансавага аддзела райвыканкама Васіль Пятроўскі і Ларыса Белая, і калі вызначаць галоўнае, то разам з наяўнасцю па асобных накірунках дзейнасці “вузкіх месцаў” — а дзе і ў каго няма праблем? — найбольш
складаная сітуацыя ў сельскай гаспадарцы.

Напрыклад, прагназуемы на год тэмп росту экспарту тавараў у нас дасягнуты. Прамых замежных інвестыцый за два месяцы прыцягнута 4,4 млн. долараў ЗША пры гадавым заданні 6 мільёнаў; за кошт усіх крыніц фінансавання ўведзена ў эксплуатацыю
2,5 тыс. квадратных метраў жылля — 125,3% да квартальнага задання; выконваецца паказчык росту зарплаты; тэмп росту рознічнага тавараабароту праз усе каналы рэалізацыі склаў 125% пры прагнозе 107%; нармальна абстаяць справы з энергазберажэннем, адкрыццём новых рабочых месцаў (177) і стварэннем камерцыйных арганізацый (14), выкананнем усіх 43 нарматываў дзяржаўных сацыяльных стандартаў і г.д.

Што тычыцца бюджэту, то па даходах ён выкананы на 100,7%, па ўласных — на 103,1%. Расходы консалідаванага бюджэту за I квартал склалі 96,5% да ўдакладненага плана справаздачнага перыяду і 20,6% — да гадавога. На фінансаванне галін мясцовай гаспадаркі накіравана 15.318,8 млн. рублёў — 18,3% аб’ёму расходаў бюджэту; развіццё жыллёва–камунальнай гаспадаркі — 14,8%; сацыяльную сферу — 76,4%. Дэбіторская запазычанасць паменшылася на 23,7 млн. рублёў, крэдыторскай па стане на 1
красавіка няма.

Што ж тычыцца сельскай гаспадаркі, то, да прыкладу, тэмп росту вытворчасці валавой прадукцыі ва ўсіх катэгорыях гаспадарак адпавядае толькі 88,2% пры заданні 105,5, у тым ліку ў сельгасарганізацыях
— адпаведна 88,4 і 110,3%. Адстаюць СВК “Калгас “Карытнае”, “Ясень”, “Каўгарскі”, “Авангард”, “Бярэзіна”, “Лапічы, “Новы шлях”, ААТ “Асіповічыаграпрамтэхзабеспячэнне”,
філіял “Белшына-агра” ААТ “Белшына”.

Вытворчасць малака ў сельгасарганізацыях — толькі 93,5%. Найбольшае адставанне па рэалізацыі малака ў СВК “Калгас “Карытнае” і ААТ 
“Асіповічыаграпрамтэхзабеспячэнне”. Не выканана заданне квартала па закупу маладняку буйной рагатай жывёлы ў насельніцтва; вытворчасць (вырошчванне) жывёлы і птушкі паменшылася на 18,1%, у тым ліку БРЖ — на 11,1% і г.д.

Карацей, на сёння вяскоўцы маюць багата нявырашаных яшчэ праблем, з якімі абавязкова трэба што хутчэй разабрацца. Аб гэтым і ішла канкрэтная размова з шэрагам кіраўнікоў, якія былі ўзняты і трымалі адказ і за сённяшні стан спраў, і дзяліліся бачаннем шляхоў па выпраўленні дапушчанага адставання. Што, натуральна, і знайшло адлюстраванне ў прынятым членамі райвыканкама рашэнні.