Дэпутат — не прафесія

У Красным Валянціна Бурачэўская жыве з 1986 года — перасялілася сюды з Краснапольскага раёна пасля чарнобыльскай аварыі, мае адпаведнае пасведчанне. Пачынаць жыццё ў незнаёмым месцы было радасна і хвалююча — новая вёска спадабалася сваёй усталяванасцю, зручнасцю, маляўнічым наваколлем і кіпучым жыццём. Праўда, нярэдка на сэрца наплывала туга, што давялося пакінуць роднае сяло. Уладкаваўшыся ў мясцовы калгас — тады ён называўся “Беларусь”, — Валянціна спачатку была дыспетчарам, а ў хуткім часе яе прызначылі галоўным эканамістам. Гэтую пасаду яна займае і ў цяперашняй “Бярэзіне”.

Вядома, калгасная кантора на вёсцы, ды калі яшчэ ў якой няма сельсавета — першая інстанцыя, куды звяртаюцца землякі па дапамогу. I Бурачэўская як дэпутат спачатку мясцовага Савета, а цяпер і раённага, заўсёды старалася выслухаць чалавека і па меры магчымасці вырашыць яго пытанне. Жанчына актыўная, мэтанакіраваная і неабыякавая да тых падзей, якія адбываюцца побач, яна заўжды выклікала давер у аднавяскоўцаў.

Час мае ўласцівасць мяняць меркаванні людзей, іх адносіны да жыцця. I гэта вельмі правільна, што сённяшнія вяскоўцы жадаюць палепшыць свае ўмовы працы і быту. Вось, напрыклад, адно з пытанняў, якое хвалюе насельніцтва Краснага і дэпутата Бурачэўскую — газіфікацыя аграгарадка. Па ранейшых планах, ужо сёлета тут павінен з’явіцца цэнтралізаваны газаправод. Не раз ужо звярталіся з гэтым пытаннем у адпаведныя службы. Цікавіць мясцовых людзей і магчымасць доступу байфлай — чаму б і не скарыстацца прагрэсам? Карацей, працаваць дэпутату ёсць над чым.

Валянціна Аляксандраўна разумее: якім зараз застанецца аграгарадок, пра такую будучыню і варта думаць. А Бурачэўская, дарэчы, з гэтай вёскай, дзе знайшла некалі свой лёс, расставацца не збіраецца. А вось моладзь, якая не замацоўваецца ў калгасе, зразумець можна: каму спадабаецца населены пункт, дзе закрыта школа? Выйсце адно: трэба рабіць усё магчымае, каб, як мінімум, гаспадарка цвёрда стаяла на нагах. Будзе сельгаспрадпрыемства — будзе жыць і Краснае. А гэта якраз у кампетэнцыі Валянціны Аляксандраўны. Дасведчаны спецыяліст, яна можа прапанаваць аптымальны выхад з той ці іншай сітуацыі, стараючыся, каб задаволенымі заставаліся ўсе бакі. Ды і не толькі прапанаваць, але і абгрунтаваць рашэнне. Такая ўжо натура ў дэпутата Бурачэўскай — любіць яна канкрэтыку і надзейнасць.

Валянціна КОРБАЛЬ.