Мінулы тыдзень стаў адметным для многіх жанчын: вясна, свята, кветкі. Але асабліва хвалюючым ён атрымаўся для трох нашых зямлячак, якія ўзнагароджаны ордэнамі Маці. На ўрачыстым мерапрыемстве ў Мінску пабывалі асіпаўчанка Ніна Сакалоўская і жыхарка Лапічаў Ніна Стэльмах, якім уручыў дзяржаўныя ўзнагароды Кіраўнік дзяржавы Аляксандр Лукашэнка, а на прыём да кіраўніка вобласці Уладзіміра Даманеўскага запрашалася Валянціна Дзярабіна з райцэнтра.

— Гэта вялікі гонар і адказнасць — атрымаць ордэн з рук Прэзідэнта краіны, — падзялілася Ніна Сакалоўская. — Урачыстая цырымонія пакінула ў душы глыбокі эмацыянальны след, усё было на вышэйшым узроўні і проста выдатна. Уразіла, з якою шчырасцю Аляксандр Рыгоравіч разважаў аб беларускіх матулях і ролі жанчыны ў жыцці нашага грамадства. Безумоўна, было прыемна адчуваць праяўленую ўвагу. Лічу, што такую ўзнагароду павінна атрымліваць не толькі мама, але і ўся   сям’я: без надзейнай падтрымкі тут ніяк. Пакінуў глыбокае ўражанне і сам Палац Незалежнасці, па якім для нас правялі спецыяльную экскурсію. Усё прыгожа, стыльна, функцыянальна. Да слова, у гэтым незвычайным месцы можа пабываць любы чалавек. Калі апісаць уражанні некалькімі словамі, то гэта душэўны ўздым, радасць, жаданне жыць і ствараць.

З такім жа захапленнем расказвала пра ўрачысты прыём у губернатара Валянціна Дзярабіна, маці 4 дзяўчынак і 3 хлапчукоў:

— Мерапрыемства выдалася вельмі хвалюючым. Па-першае, сам факт высокай адзнакі, па-другое, мне выпала ад імя ўсіх узнагароджаных шматдзетных матуль трымаць слова. Думала, што ўсё будзе толькі афіцыйна і па пратаколе, аднак у рэчаіснасці сустрэча атрымалася па-дамашняму цёплай і ўтульнай. Была магчымасць пагутарыць з кіраўніцтвам рэгіёна, пазнаёміцца з матулямі з іншых куточкаў Прыдняпроўскага краю. Спадабалася ўзнагарода і дома дзецям. Дзяўчынкі нават прымяралі ордэн — хто ведае, можа некалі і яны атрымаюць такі ж? Словам, гэтае сакавіцкае свята запомніцца на ўсё жыццё сваёю важнасцю і мноствам добрых слоў.

Валянціна КОРБАЛЬ. Фота БелТА.