У сваіх зваротах да нашых людзей старшыня райвыканкама Пётр Шукаловіч, ветэран Вялікай Айчыннай Дзмітрый Сікілінда, прадстаўнікі рэгіёнаў-пабрацімаў з Малдовы і Расіі не маглі не закрануць галоўнага ўроку, які дала вайна: права на мірнае неба над галавой — галоўнае з правоў кожнага чалавека, кожнага народа.

Наша краіна ўмее гэтым правам карыстацца і мае сілы, каб яго адстойваць, таму 70-годдзе з дня вызвалення ад нацысцкай акупацыі беларусы сустракаюць з пачуццём уласнай годнасці і абгрунтаванай упэўненасцю ва ўласнай будучыні.

Гарант гэтай упэўненасці — Узброеныя Сілы краіны, прадстаўнікам якіх і было даверана адкрыць тэатралізаваны парад-шэсце ў родным горадзе.

Баявыя машыны часцей Асіповіцкага гарнізона — цяжкія гаўбіцы “Мста”, ракетныя комплексы “Точка”, рэактыўныя ўстаноўкі залпавага агню “Смерч” — сёння самая магутная зброя нашай арміі. I ўсё ж у баі рашаючае слова не за тэхнікай, а за сілай чалавечага духу. Чырвонаармейцам, якія ў далёкім 1944 годзе не прапусцілі ворага з “бабруйскага катла”, была прысвечана міні-рэканструкцыя бою пад Вялікай Гарожай, у якім прынялі ўдзел групы ваенна-гістарычнай рэканструкцыі “Штык”, вучні СШ № 3, Цэльскай і Лапіцкай школ, ваеннаслужачыя 465 ракетнай брыгады. Рэжысёрамі дынамічнай інсталяцыі сталі вядомыя ў раёне энтузіясты ваенна-патрыятычнага выхавання моладзі — афіцэры запасу Андрэй Торбін і Юрый Сцяпанаў.

А ў памяць аб вызваленні горада адбыўся вынас сімвалічнага “Сцягу Перамогі”. У складзе ўрачыстай каробкі — ветэран Вялікай Айчыннай вайны Браніслаў Навіцкі, Ганаровы грамадзянін Асіповіцкага раёна Уладзімір Раўбель, ветэран працы Яўген Гасціла, ветэраны Узброеных Сіл Міхаіл Слесарэнка і Юрый Корбан, галоўны рэдактар “раёнкі”, лаўрэат спецыяльнай прэміі аблвыканкама “Чалавек года” Віталь Кулакоў, Заслужаны работнік культуры Анатоль Тамашэўскі, адзін з лідараў адукацыі Магілёўшчыны, дырэктар СШ № 3 Анатоль Шчамялёў, пераможца міжнароднай  алімпіяды па рускай мове гімназістка Аляўціна Балвановіч.

Фотаздымкі землякоў, якія змагаліся з ворагам, пранесла калона моладзі — удзельнікаў акцыі “Iх подзвіг мы ў сэрцы захоўваем”. Побач з ёй сцягі беларускай дзяржавы, Магілёўшчыны і раёна правезла калона байкераў.

Свой уклад у стварэнне святочнай атмасферы зрабілі спартсмены, самадзейныя артысты з калектываў “Дзівакі”, “Вечарынка”, “Сузор’е” і “Люлечка”, духавы аркестр Асіповіцкага гарнізона, бібліятэкі, удзельнікі акцый “Дзеці за мір” і “Дзеці малююць мір”.

Па заканчэнні парада яго ўдзельнікі і гледачы рушылі да Алеі Герояў, дзе па добрай традыцыі ўсклалі кветкі да мемарыяльнага комплексу.

Ну а потым у гарадскім парку пачалася насычаная і разнастайная забаўляльная праграма. Яе галоўнымі хітамі стала выступленне байцоў 5 Пухавіцкай брыгады спецыяльнага прызначэння, выстава баявых машын, якія ўдзельнічалі ў парадзе, машын выратавальнай службы.

А скончыўся гэты святочны дзень удзелам землякоў ва ўжо традыцыйнай агульнарэспубліканскай акцыі “Спяём гімн разам!” і ўражлівым феерверкам.

Дзмітрый САЎРЫЦКI.

Фота аўтара і Ніны ЦАРЫК.