У апошнім дні інфармавання насельніцтва на Асіповіччыне ўдзельнічала член Пастаяннай камісіі Савета Рэспублікі Нацыянальнага сходу Рэспублікі Беларусь па адукацыі, навуцы, культуры і сацыяльных пытаннях Алена Круцько (на здымку ў цэнтры — разам з кіраўнікамі райбальніцы і райЦГЭ Аляксандрам Сільчанка і Кацярынай Мукалавай). Аб парламенцкай дзейнасці і будучых выбарах у мясцовыя Саветы дэпутатаў і расказвае галоўурач Кіраўскай цэнтральнай райбальніцы.

— Напачатку ўдакладню, што я, калі коратка казаць, не дэпутат, а сенатар. Таму ў верхняй палаце парламента ўскладзеныя абавязкі і выконваю не на прафесійнай аснове, а калі збіраемся на сесіі — вясной і восенню. У Кіраўску ж займаюся звыклай справай — медыцынай.

На сесіях, пасяджэннях Камісій працуем надзвычай шчыльна: паступаючых з Палаты прадстаўнікоў дакументаў шмат, і далёка не ўсе яны атрымліваюць “зялёнае святло”, хапае і адпраўляемых на дапрацоўку. I гэта — нармальная з’ява, недарма ж законапраекты прымаюцца не адразу, а толькі пасля дбайнага вывучэння, неаднаразовых слуханняў.

Што тычыцца непасрэдна нашай камісіі, то зараз скрупулёзна рыхтуем змяненні ў закон аб ахове здароўя, які не пераглядаўся з 1993 года і, натуральна, у многім састарэў. Магчыма, у выніку атрымаецца нават Кодэкс аб ахове здароўя, але, паўтаруся, работы наперадзе яшчэ вельмі шмат. У падрыхтоўцы задзейнічана багата спецыялістаў, устаноў-арганізацый, грамадскіх фарміраванняў і г.д. — будучы ж дакумент тычыцца практычна ўсіх.

Цяпер — наконт выбараў-2014. Кампанія ідзе поўным ходам паўсюдна, кандыдаты ў дэпутаты вылучаны, зарэгістраваны і распачалі перадвыбарную агітацыю. Многія з выбаршчыкаў удзельнічалі ў выбарах ужо не раз, ёсць тыя, для каго падобнае ўпершыню, але звяртаюся да ўсіх без выключэння.

Безумоўна, кожны з нас аддасць голас менавіта таму, каму больш давярае, але прашу ўсіх зрабіць адно: прыйсці на выбарчы ўчастак і прагаласаваць альбо 23 сакавіка, альбо раней. Не падабаюцца прэтэндэнты на дэпутацкі мандат — выкрасліце іх наогул, гэта ваша права, вам рашаць, якія дэпутаты будуць працаваць у Савеце. Але галоўнае — выканайце грамадзянскі абавязак, аддайце свае галасы лепшым.