Рух транспарту на аўтамабільным мосце цераз раку Сінюю, што на дарозе Асіповічы-Глуск, адноўлены.

Як паведаміў начальнік ДЭУ № 73 РУП “Магі-лёўаўтадар” Генадзь Гарбачоў, капітальны рамонт гэтага аб’екта распачаўся першага чэрвеня. Першапачаткова планавалася, што на выкананне ўсіх неабходных работ спатрэбіцца пяць месяцаў, але генеральная падрадная арганізацыя ТАА “Спецмостбуд” ужо выйшла на фінішную прамую: усе работы будуць завершаны да канца тыдня. Інакш кажучы, мост будзе здадзены ў эксплуатацыю на два месяцы раней. Эканоміі часу паспрыяла нестандартная арганізацыя работы.

— У плане прадугледжваўся рамонт па частках, — растлумачыў Генадзь Анатольевіч.

— Гэта значыць рамантуецца адна палова, пасля — другая. Аднак з усімі зацікаўленымі бакамі было ўзгоднена поўнае прыпыненне руху. Гэта дазволіла працаваць у максімальна высокім тэмпе і скрупулёзна прытрымлівацца тэхналогіі. Намаганнямі падрадчыкаў і субпадрадчыкаў, якім стала наша ДЭУ № 73, гэта інжынернае збудаванне вельмі змянілася. Адрамантавалі бэлькі, рыгелі, замянілі крайнія пліты. Сучасным стаў і знешні выгляд: з’явіліся новая бар’ерная агароджа, парэнчы і лесвічныя пралёты, замест двух застаўся адзін тратуар. Ну а што тычыцца якасці, то да чарговага капрамонту мост пратрымаецца не адно дзесяцігоддзе.