Апошнія два гады паліклініка функцыянуе ва ўзмоцненым рэжыме

І тым не менш яе калектыў з запланаванымі паказчыкамі справіўся, прадэманстраваўшы ўменне перастройвацца ў залежнасці ад санітарна-эпідэмічнай абстаноўкі ў раёне.

Пры ўваходзе ў медустанову адбываецца першаснае апытанне пацыентаў з вымярэннем тэмпературы цела з дапамогай цеплавізара. Тыя, хто мае сімптомы віруснай інфекцыі, накіроўваюцца ў фільтр-боксы. Для зручнасці пацыентаў і змяншэння чэргаў устаноўлены электронны тэрмінал. А нядаўна стала працаваць тэлефонная электронная чарга, якая дазваляе хутчэй дазваніцца да рэгістратуры. У дзень такім чынам прымаецца каля дзвюх тысяч тэлефанаванняў.

Наведвальнасць установы таксама за апошнія гады вырасла ў разы. Так, летась зафіксавана 498 448 візітаў. Дома адбылося больш за 43 тысячы наведванняў.

А ўсё гэта адпаведна павысіла нагрузку на кожнага ўрача, і зараз яна складае 111%. Але калектыў медустановы не скардзіцца. Памятаючы пра свой прафесійны абавязак, дактары пры неабходнасці перакваліфі-коўваюцца з адной спецыялізацыі на іншую. Так, урачам агульнай практыкі і інфекцыяністам дапамагаюць вузкія спецыялісты, што дазваляе арганізоўваць у залежнасці ад патрэб работу да шасці кантактных брыгад адначасова. Наладжана дыстанцыйная выпіска лекавых сродкаў.

Актыўна ідзе вакцынацыя насельніцтва ад COVID-19 з выездам у розныя кропкі раёна.

І хоць час ад часу назіраюцца чарговыя хвалі ўздыму захворвання на кавід, планавы прыём пацыентаў не спыняецца.

Павялічыўся ахоп жыхароў прафілактычным аглядам — зараз ён складае 98%.

Знізіўся паказчык першаснага выхаду на інваліднасць працаздольнага насельніцтва, а гэта даволі станоўчы вынік. Колькасць выпадкаў траўматызму сярод насельніцтва таксама зменшылася. Павялічыўся працэнт абследаваных жанчын, што дазваляе своечасова пачаць неабходнае лячэнне, калі выяўлена тая ці іншая паталогія. Працягваецца і тэсціраванне на ВІЧ-інфекцыю. У мінулым годзе было зроблена 4 086 адпаведных аналізаў.

Рэалізуецца скрынінгавая праграма па раннім выяўленні раку лёгкіх, малочнай залозы, прастаты, каларэктальнага.

Вядзецца работа па своечасовым дыягнаставанні ў пацыентаў перадракавай паталогіі і назначэнні адпаведнага лячэння.

Загадчык паліклінікі Ігар Анісімаў адзначае, што, аналізуючы вынікі работы ўстановы за мінулы год, цяжка вызначыць, чый   уклад у агульную справу быў больш важкім. Увесь калектыў працаваў на поўную моц, зладжана, падмяняючы калег, якія час ад часу хварэлі. Галоўнае — работа паліклінікі вялася стабільна, людзі ў белых халатах выходзілі на працоўныя месцы нават у выхадныя дні, калі мелася неабходнасць, таму ў пацыентаў заўсёды была магчымасць атрымаць кваліфікаваную меддапамогу.