Бытавое абслугоўванне

Усе давяраюць прафесіяналу

Як правільна прасаваць бялізну, што зрабіць з застарэлай плямай, якія меры прыняць, каб адзенне не зафарбавалася пры мыцці — усе гэтыя і іншыя прамудрасці ведае Вольга Ліннік

А тлумачыцца ўсё проста: жанчына атрымала грунтоўную тэарэтычную падрыхтоўку ў Мінскім тэхналагічным тэхнікуме па спецыяльнасці “тэхнік-тэхнолаг па хімчыстцы і афарбоўванні адзення” і мае 33-гадовы вопыт работы ў пральні. За гэты час літаральна праз яе рукі прайшло мноства тэкстыльных вырабаў з самых розных па якасці і фактуры тканін. Яна можа па знешнім выглядзе вызначыць, ад чаго з’явілася пляма на паліто ці пінжаку, падлічыць, колькі парашку неабходна затраціць на мыццё пэўнай колькасці адзення, параіць, як захоў-ваць скураныя вырабы…

Вольга Пятроўна працуе ў пральні камбіната бытавога абслугоўвання прыёмшчыцай заказаў з выкананнем абавязкаў загадчыка. Многія работы вядзе сама, бо аб’ём іх немалы: абслугоўваюць бальніцу, гасцініцу, інтэрнаты, ДЭУ, АЗТМ і іншыя арганізацыі. Сёлета выйгралі тэндар на супрацоўніцтва з ваеннай часцю. Здаюць бялізну на мыццё і жыхары горада. На хімічную чыстку таксама паступае нямала рэчаў: верхняе адзенне, падушкі, коўдры, пледы, шторы, дываны…

Асабліва напружаны час тут напярэдадні Вя-лікадня, калі гаспадыні пачынаюць генеральную ўборку і аддаюць у апрацоўку ўсё самае грувасткае.

Нярэдка прыносяць і асобныя прадметы адзення, каб вывесці плямы, што не адмываюцца звыклым спосабам. Работнікам установы лягчэй справіцца з забруджваннем, калі яны ведаюць, якое рэчыва яго выклікала, бо ў іх арсенале шмат розных растваральнікаў, а ў кожным канкрэтным выпадку трэба ведаць, які з іх прымяніць. Дарэчы, найлепшы вынік дасягаецца, калі гаспадар рэчы не спрабаваў змагацца з плямай уласна прыдуманымі сродкамі, бо гэта толькі ўскладняе справу. Часцей за ўсё рэчы пасля хімчысткі набываюць прывабны выгляд, але ёсць і такія субстанцыі, як, напрыклад, суперклей, сляды якога немагчыма цалкам выдаліць. Пра гэта і іншае не раз пытаюцца землякі, якія нярэдка звяртаюцца за парадай да Вольгі Пятроўны. І заўсёды атрымоўваюць абгрунтаваныя адказы.

Дома яна таксама галоўны змагар з брудам. “Муж нават пральнай машынкай карыстацца не ўмее, — усміхаецца суразмоўца. — Ва ўсім давярае прафесіяналу”. І ён мае рацыю.